Шолбан Кара-оол Тываның чедери берге Тожу кожуунунче волокно-оптиктиг харылзаа шугумун шөерин Николай Никифоровка саналдаан

 Май 18-те, Москва хоорайга, Тываның Баштыңы Шолбан Кара-оол Россияның харылзаа болгаш массалыг коммуникация сайыды Николай Никифоров-биле ужурашкан. 

 Федералдыг сайыттың эвилең-ээлдээн база регионну деткииринге сонургалдыын республика баштыңы онзалап айыткан. 

  «Тывада харылзаа адырында берге айтырыгларны чугаалаштывыс. Эрткен чылын федералдыг яамының деткимчези-биле бурунгаар базым кылдынган: 250-ден 500 хире чурттакчылыг 13 тыва суурларже 1000 км волокно-оптиктиг харылзаа шугуму шөйдүнген. Бөгүн чедери берге Тожу кожуун талазынче ону шөериниң аргазын чугаалажып көрдүвүс. Н.А. Никифоров ол айтырыгны кичээнгейге алды, база ол ышкаш тус черниң телерадиодамчыдылгазын сайзырадыр арганы өөренип көөрүн дугуруштувус» - деп, социал четкиде бижикчилеринге Шолбан Кара-оол дыңнаткан. 

 Николай Никифоров биле Шолбан Кара-оолдуң дугуржулгазының база кады ажылдажылгазының ачызында, 2018 чылда боттандырар турган «Чурагайның дең эвес чоруун чайладыры» төлевилел 2015 чылда күүсеттингенин сагындыраал. Эвээш санныг чурттакчыларлыг 13 суурларже 1 муң хире км волокно-оптиктиг харылзаа удазынын чоруткан. Республиканың 9 кожуун төптеринче ВОХШ тудуун улаштыр тударынга оптиктиг ол шугумну ам-даа ажыглаар. 

  Тываның Баштыңы Шолбан Кара-оол Николай Никифоров сайыт-биле ужуражылга үезинде, ыраккы Ырбан суурже ВОХШ-туң тудуу Тожу кожууннуң административтиг төвү - Тоора-Хем суурну дүрген ажылдаар интернет-биле хандырарын чедип алыр деп, ол демдеглээн.