Тываның Баштыңы Шолбан Кара-оол биле Күрүне Думазының депутады Лариса Шойгу Май бирниң чыскаалынга киржип, хоочуннарга байыр чедирген

 Эмчилер, тудугжулар, коммунал ажыл-агый ажылчыннары, саң-хөөчүлер, алдын казыкчылары, энергетиктер, харылзаачылар, журналистер, педагогтар, студентилер күш-ажыл болгаш тайбың дугайында өңгүр лозунгулары, өткүт ырылары-биле найысылалдың чурттакчыларының база аалчыларының кичээнгейин хаара туткан. 

 Тываның Баштыңы Шолбан Кара-оол биле Күрдуманың депутады Лариса Шойгу Май бирниң чыскаалынга киржип, хоочуннарга байырны чедирген. Республика Баштыңы Шолбан Кара-оол байырлалдың киржикчилеринге байырны чедирген: 

 - Хүндүлүг чаңгыс чер чурттуглар! Частың болгаш Күш-ажылдың байырлалы – Майның бири-биле чүрээмниң ханызындан байыр чедирдим! Таптыг-ла 130 чыл бурунгаар төрүттүнген бо хүн бүгү делегейде миллион-миллион ажылчы чоннарны каттыштырган. Ылаңгыя бистиң чуртувуста ол дыка хүндүткелдиг. Туктар, чыскаалдары-биле онзагай бо хүн дыка хөй салгалдың российжилеринге таныш. 

 Бистиң хүндүлүг хоочуннарывыска бо байырлал хүнүнде онза хүндүткелдиң сөстерин илередейн! ТАЙБЫҢ! КҮШ-АЖЫЛ! МАЙ! Бо үш сөстү дыка эки сактыр силер. Май бирниң чыскаалдарында, митингилерде база чыыштарда плакаттарга киискип, байырлал одуругларында диңмиреп турган! 

 Амгы Россияда Майның бири ажылчыннарның эп-сеткил каттыштырылгазының хүнү бооп арткан. Күчүлүг Төрээн чуртувустуң, улуг болгаш найыралдыг өг-бүлениң чугула кезээ кылдыр бо хүнде бодувусту билип турар бис! Күш-ажылдың кижизин бо хүн алдаржыдарывыс чаңчылчаан. 

 Бистиң чуртувустуң чоргаарланыр чүүлдери хөй! Россияның экономиказы чаа глобалдыг байдалдарга чаңчыга берген болгаш катап тургустунуп эгелээн; бистиң Армиявыс Сирияда делегей террорун узуткап, делегейде эң-не профессионал болгаш дээштиг күш дээрзин бадыткаан; бистиң чуртувус делегей рыногунче катап эглип, кызыл-тастың эң-не хөй үндүр садыкчызы апарган; космос делгемнерин шиңгээткен бир дугаар чурт Россия бооп арткан!

 Бо хонуктарда, апрель 28-те, Восточный аттыг бирги российжи космодромдан бирги ракета алыкчызы ужуп үнгеш, космос делгеминче үш спутникти салган. «Российжи космонавтика хөгжүлдезинде дыка шыңгыы, улуг базым-дыр. Чоргаарланыр чүүл бар-дыр» - деп, чурттуң Президентизи Владимир Владимирович Путин демдеглээн. Ол дээрге космодромнуң тудугжуларының, инженерлерниң, эртемденнерниң, ажылчыннарның, башкарылга төвүнүң специалистериниң база аңгы-аңгы мергежилдерниң чүс-чүс кижилерниң күш-ажылы-дыр!

 Россияның хөй националдыг чону бодунуң күш-ажылы, талантызы-биле амыдыралдың шупту адырларында бедик чедиишкиннерни чедип ап чоруур! 

 Хүндүлүг чаңгыс чер чурттуглар! Тывада чедиишкиннеривис-биле чоргаарланып болур бис. Карак кызыл күш-ажылдың ачызында республика сөөлгү чылдарда бурунгаар хөгжээн! Аэропортту чаартыры, М-54 автооруктуң угланыышкынын өскертири дээн ышкаш улуг чаартылгалар шиитпирлеттинип турар. Кызыл-Чадаана аразының чырык шугумун чаартыры доозулган. 

 Биче болгаш ортумак сайгарлыкчы чорук хөгжээн. «Бир суур – бир бүдүрүлге» төлевилел чедиишкинниг боттаныышкында. «Аныяк өг-бүлеге кыштаг» база «Чемгерикчи инек малым» деп чаа төлевилелдер эгелээн. Эки талаже өскерлиишкиннер көскү! 

 Ам сорулга – республиканың чурттакчы кижизи-ле ол өскерлиишкиннерни эскерерин чедип алыр. Бодунуң өг-бүлезиниң бюджединге, бодунга артыктылды чедип алыр кылдыр. Ол сорулганы чедип алырының чаңгыс идегелдиг, бүзүрелдиг аргазы – күш-ажыл! Бодунуң ажылдаар черинге шынчы болгаш харыысалгалыг ажылдаары-дыр. Профэвилелдер, ажыл берикчилери база эрге-чагырганың кады ажылдажылгазы-дыр. Тывада амыдырал-чуртталганың шынарын бедидеринче бистиң чаңгыс аай чүткүлүвүс-түр. 

 Демнигде – күштүг бис! 

 Ортумак назынның кижилеринге база аныяктарга - бистиң «бөгүнгү» база «даартагы хүнүвүстү» тургузар кижилерге мону чугаалайн! Бистиң чуртувуска, бистиң республикавыска силерниң күш-ажылыңар ажыктыг! Силер – бистиң төрээн чуртувустуң идегели болгаш ынаныжы силер! Бодуңарның күжүңерге бүзүрелди бо онзагай байырлал силерге берзин! 

 Частың бо хүнүнде күш-ажыл силерге өөрүшкүнү сөңнээр болзун. Ол силерге моральдыг блгаш материалдыг сагыш сеткил ханыышкынын эккелзин. Кадыкшылды, ажыл-ижиңерге чедиишкиннерни база өг-бүлеңерге билчилгени күзедим. Күш-ажылыңар, Төрээн чериңерге ынакшылыңар дээш, четтирдим!