01.04.2016
Эргим чаңгыс чер-чурттугларывыс!
Частың болгаш Күш-ажылдың байырлалы-биле силерге чүректиң ханызындан изиг байырны чедирип тур бис!
Бо дээрге кижилерниң шажын-чүдүлгезинден, сөөк-язызындан болгаш политиктиг туружундан хамаарылга чокка, ажылдап шыдаар болгаш ажылдаарынга ынак, ак сеткилдиг күш-ажылды бодунуң чедиишкиннериниң, өг-бүлезинге чогумчалыг болурунуң, республиканың, бүгү чурттуң чаагай чоруунуң кол негелдези кылдыр санап чоруур салгалдарны каттыштырып турар чараш болгаш кайгамчык байырлал-дыр.
Экономиктиг байдалдар бөдүүн эвес турза-даа, Тыва эрткен чылдың түңнели-биле Сибирьниң регионнарының рейтингизинге көскү турушту ээлээн. Үлетпүр бүдүрүлгезиниң немей өзүлдезиниң, тудуг материалдарының болгаш чонга төлевирлиг ачы-дузаның хемчээлиниң, кол капиталга инвестицияларның, үүрмектеп садыг-саарылгазының, айда ортумак ажыл төлевириниң өзүлде темпизиниң, көдээ ажыл-агый продукциязын бүдүрериниң талазы-биле республика мурнуку одуругда.
Май бирниң алгап турары күш-ажылдың кижизинге болгаш өске-даа үнелиг чүүлдерге хүндүткел бистерге, республиканың чурттакчыларынга чугула ужур-дузалыг. Бир эвес бистиң черивиске чуртталганың чогумчалыг болурун, Тываның чечектелирин, маңаа бистиң ажы-төлүвүстүң амыдыралы төлептиг болурун күзээр болзусса, кижи бүрүзү бодунуң туружунга күжениишкинниг ажылдаар ужурлуг. Боттарының ажыл-агыйы болгаш бүдүрүлгезин боттары тургузар, боттарының холдарының болгаш салым-чаяанының бүдүрүп шыдаар чүүлдерин дилеп тывар херек.
Силерниң дыка хөйүңер ынчаар бодап турарынга бүзүрээр бис. Ажылга ынакшыл, күчү-шыдал, ажыл-херекчи хөөн, чедиишкиннерже болгаш төлептиг келир үеже чүткүл төрээн респубиканың хөгжүлдези-биле, боттуң амыдыралының деңнелин бедидери-биле холбашкан сорулгаларын кады шиитпирлеп шыдаар бис. Республиканың чаагай чоруу дээш ажыл-амыдыралдың аңгы-аңгы адырларында ак сеткилдиг болгаш шынчы ажылдап турар бүгү кижилерге четтирдивис.
Бо хөй хонуктуг дыштаныр хүннерде төрел болгаш чоок кижилериңер-биле эки дыштанып, чаа-чаа ажыл-херектерже күштү мөөңнеп алырын силерге күзедивис. Байырлал-биле, өңнүктер!
Тыва Республиканың Баштыңы Ш. Кара-оол.
Тыва Республиканың Дээди Хуралының (парламентизиниң) даргазы К.Даваа.