Кызылда төп буддийжи комплекстиң тудуунче шупту күштерни мөөңнээр

 2015 чылдың август айда Дрепунг Гоманг хүрээзиниң ламалары регион удуртукчузунуң саналы-биле Кызыл хоорайда буддийжи хүрээ комплекизиниң тудуу турар черни ыдыктаан.

 «Субедей» спорт комплекизинден ырак эвесте объектиниң орнун Ыдыктыг Далай-Лама башкы айтып, арамайлаан турган. Бо хүнде ол тудугну коммерцияга хамаарышпас фонд туттуруп турар. 

 Тываның Баштыңы бодунуң блогунга ол төлевилелдиң боттаныышкынче сайгарлыкчыларны, хуу деткикчилерни чалаарын дыңнаткан: 

 «Бир-ле шагда, эрге-чагырга шажынның ыдыктарын чок кылып, ооң төлээлерин репрессиялаан. Ындыг болзажок, чоннуң угаан-медерелинден ону чок кылыры болдунмас. Бөгүнде, шажынның эге дөстерин билип алыр дээн кижилерниң негелдези улгаткан. Күрүне биле шажын ийи аңгы чоруур-даа болза, өрени эгидер апаар... Шынныг чорук орай-даа бол, дөмей-ле катап өндереп кээр дээри шын ышкаш. Күрүне деткимчени ажыы-биле көргүзер ужурлуг. Хүрээ тудары – оргу шөл кежери эвес-тир дээрзин, арга-дуржулгамдан билир мен. Ол ындыг-ла белен эвес шылгалданы эртери-дир. Воскресенск кафедралдыг соборну чедир тудуп үндүрдүвүс, Туранда православ хүрээни тудуп тур бис. Кызылда төп буддийжи комплексти тударынга бүгү күштерни хаара тудар мен. Бодунуң чонунга болгаш республиказынга ынак Тываның сайгарлыкчылары-биле ол бүгүнү кылып шыдаар бис».