Ээзиниң адын сиилбээн стипендияларны Тывада салым-чаяанныг 17 уругга бээр

 Тывада уран чүүл болгаш культураның алдар-аттыг ажылдакчыларының өг-бүлелери, чогаадыкчы эвилелдер болгаш коллективтер ээзиниң адын сиилбээн стипендияларны салым-чаяанныг уругларга тыпсыр дугайында Тываның Баштыңының саналын деткээн.

 Тываның Баштыңы ТР-ниң Чазааның ол талазы-биле доктаалынга атты салып, ол 2016 чылда Культура яамызының ажыл-чорудулгазының кол кезээ болдурарын хүлээндирген.

 Тывада чүгле чаңгыс – Тываның культура сайыдының стипендиязы бар. Ону культура адырында, 12 аңгы угланыышкынныг мергежил аайы-биле, Кызылдың уран чүүл колледжизиниң эки өөредилгелиг студентилеринге премия кылдыр чылда чаңгыс катап тыпсып турар. Шолбан Кара-оолдуң, 2016 чылдан эгелеп, салым чаяанныг уругларны болгаш студентилерни деткиир саналынга хөй-ниити база каттышкан.

 Тываның хөгжүлдезинге улуг үлүг-хуузун киирген, боттарының алдар аттыг кижилериниң дугайында, тураскаалга адын сиилбээн стипендияларны тургузарын культура болгаш уран чүүлдүң алдарлыг М.С.Хомушку, М.М.Оюн, А.А.Панов, Т.Т.Балдан, И.Г.Минин, Т.А.Леонтьев, И.Ч.Салчак, А.Я.Чихачев, С.А.Калинин дээн ышкаш кижилерниң өг-бүлелери каттышкан. 

  Оон аңгыда Тываның Чазааның Үрер хөгжүм оркестри, ыры болгаш танцының «Саяннар» ансамбли, В. Көк-оол аттыг хөгжүм-шии театры, Тываның национал оркестри, республика филармониязы, Композиторлар база Чурукчулар эвилелдери аныяк талантыларга боттарының стипендия фондузун тургузарын шиитпирлээн. 

  Амгы үеде ТР-ниң Культура яамызы биле меценаттар кады, стипендиаттарны шилиириниң негелделерин, чылдың стипендиязының хемчээлин тодарадыр ажылдарны кылып турар. Чүгле эки өөредилгези эвес, а аңгы-аңгы деңнелдиң конкурстарынга болгаш фестивальдарынга тиилелгези дээш премияларны тыпсыр. Төлевилелдиң авторлары аныяктарның чогаадыкчы болгаш профессионал бот-сайзыралының бедиин чедип алырынга ындыг арга-биле дузаны чедирер бодалдыг.