Тываның Баштыңы: РФ-тиң Президентизи В.В. Путинге российжилер эң-не чидиг айтырыгларны салган

 Кол-ла чүве, ооң мурнунда экономиктиг кризистиң уржуктары аар турганын кижилерниң билип турарында. Ам база ындыг-ла амыр эвес үеде чурттап турар бис, ынчалза-даа Владимир Владимировичиниң бодамчалыг хөделиишкиннериниң ачызында, бисте «айыыл чок чоруктуң сыртыы» ажылдап турар хевирлиг. Келир чылдан бээр байдал чүгээртээр деп чурттуң баштыңы демдегледи, бистиң шуптувуска эң кол чүве ол деп санаар мен» - деп, апрель 14-те Владимир Путин-биле дорт харылзааның түңнелдерин Тываның Баштыңы Шолбан Кара-оол тайылбырлаан. 

 РФ-тиң курлавыр фондузун бо чылдың дургузунда долдурарындан ойталаар-даа болза, ол дөрт чылда четчир деп, дорт харылзаа үезинде чурттуң Президентизи Владимир Путин дыңнаткан. 

 «2014 чылдың эгезинде турганы деңнелге Төп Банкының делегей курлавыры эглип келген» - деп ол чугаалаан. Ооң чугаазы-биле алырга, чазактың курлавыр фондулары – курлавыр фондузу биле ФНБ – ындыг-ла кончуг хөй эвес хемчээлге эвээжээн. Бо хүнде ол тус-тузунда 50 млрд. биле 71 млрд. доллар эквивалентизинге дең, азы чурттуң НИП-тиң 10,5 хуузу». 

 «Ол дээрге, эрткен чылда чарыгдалывыс ышкаш, ындыг чурум-биле чарыгдап, чүнү-даа кылбайн, кандыг-даа долдуруушкун чорутпас болзувусса, эвээш дизе дөрт чылда четчир» - деп, тайылбырлаан. 

 «Ындыг болзажок бистер планнаашкынны кылып турар бис, келир чылда экономика көдүрлүр ужурлуг, ынчан курлавыр фондузундан ынча хирени чарыгдавас апаар бис деп бодап тур мен. Ол талазы-биле кандыг-даа сезиг турбас ужурлуг» - деп, чурттуң баштыңы чонну оожургаткан. 

 «НИП-тиң 10,5 хуузу — чүл ол? Ол дээрге дөрт чыл иштинде кым чүнү-даа кылбайн, ажылдаарын соксадып болуру-дур» - деп президент чугаалаан. 

 Россияның Президентизи төп каналдарга болгаш радиостанцияларга российжилер-биле он дөрт дугаар харылзажып, чугаалашкан. Чурттуң баштыңы 3 шак 40 минута үргүлчүлээн теледамчыдылга үезинде 80 айтырыгга харыылаан. Ол програмаже үш миллон ажыг айтырыглар келген. 

  Дамчыдылганың стенограммазын KREMLIN.RU сайттан номчуп болур.