Ыраажы Сайлык Оммунга «ТР-ниң алдарлыг артизи» атты Тываның Баштыңының чарлыы-биле тывыскан

 Тываның Баштыңы Шолбан Кара-оол ыраажы Сайлык Оммуннуң концертин көрген. «Тыва фольклорнуң кайгамчык күүседикчизи, салым чаяанныг Сайлык Оммунга «Тыва Рспубликаның алдарлыг артизи атты» улуг өөрүшкү-биле тывыстым. «Звезда» телеканалда «Чаа сылдыс» ыры конкурузунуң смс-бадылаашкыны чоруп турар. Бистиң ыраажывыс Сайлык Оммунну деткииринче шуптуңарны кыйгырдым!» 

  Тыва Республиканың национал оркестриниң үделгези-биле улустуң ырызындан эгелээш, «Угулза» аас чогаал бөлүүнге киржилге, клавишалыг хөгжүм херекселинге бодунуң оюну, рок күүселдезинге чедир, ыраажының хөй талалыг талантызын көрүкчүлер магадаан. 

 «Чаа сылдыс» конкурстуң чаа сезонунуң бирги чадазында Сайлык Оммун Тывазының болгаш ооң чонунуң дугайында «Сыгыт-хөөмей» деп ырыны тыва дылга бараалгаткан.

 Сайлык Оммуннуң күүселдезиниң соонда6 программаның башкарыкчызы Оскар Кучер «Октаргайда ышкаш!» деп магадааш, жюриниң бир кежигүнү - Василий Бархатовтуң үн бербейн, чээрби санны казааны дээш, хомудалын ажыы-биле чугаалаан. 

 Денис Майданов «дыка онзагай күүселде» дээш ыраажыга байырны чедирген болза, дараазында турга Сайлык Оммунну база катап дыңнаксап турарын ыраажы Зара чугаалаан.

 «Чаа сылдыс» төлевилелге киржир күзелди ооң дөрт харлыг оглу Чаа чылда илереткенин Сайлык сонуургаткан. «Чаа сылдыс» сайт конкурстуң киржикчилеринден кыска айтырыгларны салып турар. «Звезда» телеканалга бистиң чаңгыс чер чуртуувустуң харыылары бо. 

  - Тывада эң-не ынак чериңер? 

 - «Азияның төвү» тураскаал. 

 - Тывадан туристер кандыг суй-белектерни эккеп болурул? 

 - Тыва мастерлерниң чонар-даштан сиилбээни янзы-бүрү дүрзүлер бооп болур. Эң-не кол белек – фоточуруктарга азы видеога тырттырган сактыышкыннар. 

  - Сценага бир дугаар үнгениңер?

  - Биргиклассчы тургаш, Кызылда хөгжүм-шии театрынга, республиканың уран чүүл школазының хору-биле, ава дугайында ырыны ырлааным! 

 - Бир эвес ийи кижиниң ырызын күүседир арга тыптып келген болза, кым-биле ырлаксаар сен? 

 - Бьорк, Пелагея, Лепс азы Стинг.