Тываның Баштыңы дүрген хөделир албаннарга онза байдалдар үезинде белеткелдиг болурун негээн

 «Кызылдан 50 хире километр черге, дүүн 22.50 минута турда, 4,5 магнитудалыг элээн шыңгыы чер шимчээшкини болган. Бойдус халаптарының дугайында чугаа чоруп турда, спутник багай дээри – чылдак. Шак ындыг үелерде дарый хөделиишкиннерни чорудар херек. Чазак деңнелинге чыглып, Кызыл хоорайда база чоок чыдар кожууннарда объектилерни хынап көөр даалганы дораан бээр. Чүге дизе Кызыл хоорайда бажыңнарның болгаш оран-саваның 70 хуузу эргижирээн» - деп Тываның Баштыңы чугаалаан. 

 Онза байдалдар комиссиязының хуралынга чамдык сайыттарның дыка озалдап база чамдыктарының шуут келбээнин, регионнуң удуртукчузу сойгалааш, территориалдыг федералдыг органнарның удуртукчуларынга шалыпкын ажылдаарын сүмелээн. 

 «Хоорайның база чамдык кожууннарның чурттакчылары девидеп, ындыг орай үеде, кудумчуларже үнүп келгеш, чүү болганынга медээни негеп турган. Социал четкилерге мээң дыңнадыым соонда дораан-на, бир шак иштинде-ле 350 лайк чыыпты. Хөй-ниитиниң негелдези ол хире болган. База бир чугула чүүл – чонче кичээнгейни углаар. Социал четкилерде кижилер боттарының сагыш-сеткилин үлежип турар: бир кижи корткан, бир кижи девидээн, а бир кижиге ол болуушкун - анаа-ла бир хөг. 25-ден 70 муң чедир бижикчилерлиг ниитилелдерниң ол бижимелдериниң аразында, мындыг таварылгада чугула херек, чогуур тускай албаннарның: ОБЯ биле ХК база ОБ агентилелиниң болуушкуннуң дугайында медээзи, оон чайлаарының аргалары, психологтуң сүмелери чок болду» - деп, Шолбан Кара-оол демдеглээн.

 Республика территориязында чер шимчээшкиннери доктаамал бооп турары-биле, өөредилгелерни удаа-дараа эрттирип турарын ол албан черлеринге онааган.