Тывага Төп шериг округунуң Офицерлер бажыңының ансамбли оюн-көргүзүүн бараалгаткан

 Республика Ада-чурт камгалакчызының хүнүнүң бүдүүзүнде онзагай белектиг болган. Россия Федерациязының культуразының алдарлыг ажылдакчызы Станислав Довгалюктуң удуртулгазы-биле, Екатеринбург хоорайдан, Төп шериг округунуң Офицерлер бажыңының ансамбли кызылчыларга оюн-көргүзүүн бараалгаткан. 

 Алдарлыг коллективтиң Тывага программазы чымыштыг болган. Баштай Кызылдың президентиниң кадет училищезиниң сургуулдарынга, оон Улусчу чогаадылга бажыңынга халас концерттерни көргүскен. Фойеге аңгы-аңгы үелерниң шериг чепсээниң коллекциязын делгээн. 

 Екатеринбург хоорайдан, 1942 чылда тургустунган болгаш эң-не улуг назылыг коллективтериниң бирээзи, делегей конкурстарының лауреады, ады-сураа алгаан А.Поличкин аттыг улусчу танцы ансамблиниң концертин чон сонуургаан. 

  Ансамбльдиң солистери, аныяк-даа болза, бүгү чуртта билдингир ыраажылар: «Голос» төлевилелдиң киржикчизи Артем Каторгин «Для меня нет тебя прекрасней» ырыны база Мистер Икстиң ариязын; «Битва хоров» төлевилелдиң киржикчизи Глеб Бессонов биле Евгений Кудряшов «Любите, девушки, простых романтиков», «Мечты сбываются» дээш өске-даа билдингир ырылар-биле көрүкчүлери өөрткен. 

 Оон аңгыда кайгамчыктыг скрипач Семен Хасен биле «Офицерское трио» ыры-хөгжүм ансамбли солун номерлери-биле көрүкчүлерге бараан болган. Олар шупту аңгы-аңгы дайынчы хөделиишкиннерниң киржикчилери болур.