АРАПТАННАРНЫҢ ӨГ-БҮЛЕЗИНИҢ ИЙИСТЕРНИ - ЧЫЛДЫҢ БАШТАЙГЫЛАРЫ

 2016 чылда Тывага бир дугаарында Араптаннарның өг-бүлезинге ийис кыс чаштар республиканың перинаталдыг төвүнге январь 1-де 00.20 шакта төрүттүнген. 

 Тываның Баштыңы аас-кежиктиг өг-бүлеге чаштарның төрүттүнгени база Чаа чыл-биле байырны чедирген. Төптүң эмчилериниң дыңнатканы-биле, ийиспейлер кадык болгаш деңзизи өй-тавында (2 килограмм 700 грамм биле 2 килограмм 9 грамм) болган.

 Чаа чылдың баштайгы минуталары аас-кежиктиг албан-хаакчы Араптаннарның өг-бүлезин ийис кыс уруг-биле шаңнаан. Оларның бирээзин авазы Оргаадай деп адаан, а ийигизиниң адын ачазы адаар. Ийистерлиг болганы-биле Араптаннар хөй ажы-төлдүг өг-бүлелерниң санынче кирген. Олар ийи харлыг оолдуг. 

 Жанна Араптанга байыр чедирери-биле ТР-ниң Чазааның болгаш Кадык камгалал яамызының төлээлери кээп, аныяк авага колясканы белекке берген. Бо чылын бир дугаар төрүттүнген ийис уругларлыг болган аныяк өг-бүлеге база акушер эмчилерге Тываның Баштыңы Шолбан Кара-оол  байыр чедирип, быжыг кадыкшылды, аас-кежикти күзээн. 

 2016 чылдың 9 дыштаныр хүннеринде республикага 204 чаштар төрүттүнген. Оларның алдызы ийис уруглар болган. Республиканың перинаталдыг төвүнге Чаа чылдың баштайгы ийис кыс уругларының соонда, 08.50-09.00 шакта 2 дугаар ийис чаштар база төрүттүнген.