Хатааты камгалал болгаш онза байдалдар агентилелиниң автопарыгы КамАЗ баазазында дизельдиг электростанциялыг автомастерская-биле четчелеттинген

 Барык 6 млн. рубль өртектиг, КамАЗ баазазында дизельдиг электростанциялыг автомастерская Тыва Республиканың Хамааты камгалал база онза байдалдар агентилелиниң автопарыгында немешкен. Тываның территориязында бойдус болгаш техногенниг онза байдалдарны узуткаар сорулгалыг аар өртектиг автомашинаны материалдыг курлавырлар фондузунче киирген. 

 Республиканың Баштыңы Шолбан Кара-оол Цельсийнии-биле казыыр 60 градус куду температурага ажылдаар кылдыр таарыштырган кузов-фургонну, дизельдиг одалга-вентиляция тургузуглуг чаа техниканы сонуургап көрген. Арга-дуржулгалыг специалистиң удуртулгазы-биле машинаны эки тудар, ынчангаш харыысалгалыг кижини тодарадып, аңаа салырын Шолбан Кара-оол демдеглээн. 

 Дизельдиг электростанциялыг КамАЗ-ты онза байдалдар үезинде, ол ышкаш ыраккы чурттакчылыг черлерге ажыглаар. ХК болгаш ОБ агентилелиниң шупту автопарыгын хынап көргеш, республиканың баштыңы ээлчеглиг соок кышка белен турарын ажылдакчыларга сагындырган. Мөөңнекчи күштер болгаш дериг-херекселдер кезээде белен турар ужурлуг, деп ол чугаалаан. ХК болгаш ОБ агентилелинде боттарының даанган онаалдаларын ак сеткилдиг күүседип, тускайлаттынган автомашиналарны төлептиг эдилеп турар эки ажылдыг чолаачыларны шаңналдарже киирерин Шолбан Кара-оол сүмелээн.