Кадык камгалал болгаш социал хөгжүлде яамыларның удуртукчуларын томуйлаан

Республиканың Кадык камгалал болгаш социал хөгжүлде яамызын Кадык камгалал яамызы болгаш Күш-ажыл болгаш социал хөгжүлде яамызы деп ийи аңгы албан черинге чарганындан республиканың Чазааның составы немешкен.
    Республика Баштыңының Чарлыын езугаар кадык камгалал сайыдынга Орлан Эрес-оолович Донгак томуйлаткан. Орлан Донгак 1967 чылдың март 27-де Чадаана хоорайга төрүттүнген, Москваның Пирогов аттыг 2-ги медицина институдунуң доозукчузу. 1993 чылда Кызыл хоорайга республиканың №1 эмнелгезинге интернатура дооскан. Республиканың №1 эмнелгезинге нейрохирург, Россияның медицина академиязының нейрохирургия кафедразының организакчызы, №1 эмнелгениң нейрохирургия салбырының эргелекчизи болуп ажылдап турган.
    Чаа сайытты таныштырып тура, Шолбан Кара-оол Орлан Донгактың кандидатуразын хөй кижилер-биле сайгарып чугаалашкан деп дыңнаткан.
    Кадык камгалал системазын чаартырының талазы-биле хөй-хөй хемчеглер ооң удуртукчузун хынамчалыг шилиирин негээн. Республика 2 миллиард хире рубльди шиңгээдип алыр. Кадык камгалалга ол хире хөй акша кажан-даа кирбээн. Оон-даа хөй айтырыглар бар—деп, ол уламчылаан.
    Сайыттың бирги оралакчызынга Белекмаа Доржуевна Монгуш томуйлаткан. Ол 1965 чылдың январь 1-де Кызылга төрүттүнген, 1987 чылда Красноярскиниң күрүнениң медицина университедин дооскан. Республиканың №1 эмнелгезиниң кол эмчизиниң оралакчызынга, республика поликлиниказының эргелекчизинге ажылдап турган.
    Күш-ажыл болгаш социал политика сайыдының хүлээлгезин күүседир кылдыр Мерген Дадар-оолович Ооржакты томуйлаан. Ол ооң мурнунда кадык камгалал болгаш социал хөгжүлде сайыдының оралакчызы турган. Ооң бирги оралакчызының хүлээлгезин Алдын-кыс Темир-ооловна Конгар күүседип эгелээн. Ол Тыва Республиканың Чонну ажылга хаара тудар агентилелдиң удуртукчузунга ажылдап турган.

Чуруктар Виталий Шайфулиннии