«Кадыкшылдың маршруду» губернатор төлевилели-биле бо чылдың эгезинден бээр ыраккы кожууннарда 499 малчынны шинчээн

 Республиканың медицина профилактиказының төвүнүң берген медээзи-биле алырга, «Кадыкшылдың маршруду» губернатор төлевилелиниң боттанылгазы-биле 2015 чылдың эгезинден бээр 499 малчынны шинчээн. Шинчилге эрткен малчыннарның 15 хуузу шуут кадык деп түңнелди алган. 28 хуузунда азы 141 кижиде аарыгларның эге чадалары барын, а 283 кижиге тускай бедик технологиялыг медицина дузазы херегин тодараткан. 

 Бо чылдың февральдан бээр «Кадыкшылдың маршруду»-биле республиканың кожууннарынче 21 үнүүшкүннү кылган. Улуг кичээнгейни чедери берге ыраккы суурларже углаан. Губернатор төлевилелиниң кол-ла сорулгазы - долу, чедингир эмчи шинчилгезинче ыраккы болгаш чедери берге кожууннарның чурттакчыларын хаара тудары болур. 

 Шимчеп чоруур эмчи дериг-херекселдери-биле Тываның 17 кожуунунуң 5704 чурттакчызын шинчээн. 128 кижиге, ооң иштинде 32 малчынга немелде шинчилгени эртерин сүмелээн. Чыдып эмнедир кылдыр 76 кижиге, ооң аразында беш малчынга бижиктерни берген. 55 аарыг кижиге база 7 малчынга бедик технологиялыг медицина ачы-дузазын алырын айыткан.

 Үнүүшкүннүг бригадазының составында акушер-гинеколог, офтальмолог, невролог, кардиолог, травматолог-ортопед, эндокринолог, уролог, оториноларинголог, онколог, эндоскопист, УЗИ шинчилгезиниң эмчилери бар. Губернатор төлевилелиниң боттаныышкынында 14 эмчи хаара туттунган, оларның 21 хуузу - дээди, 28 хуузу - бирги, а 7 хуузу ийиги категорияның эмчилери. 

 Чыл төнчүзүнге чедир «Кадыкшылдың маршруду» төлевилел республиканың алды кожуунунга шинчилгелерни организастаар.