Тыва ноябрь 1-де бирги бүгү-российжи география диктантызынга киржир

 Ноябрь 1-де бүгү Россия демир-үжүктерни тудуптар, деп «Тува 24» телеканал дыңнаткан. Чурттуң бүгү регионнарынга Орус географтыг ниитилелдиң «Россия – мээң чуртум» бүгү-российжи география диктантызынга акция эртер. Ооң түңнелдери российжилерниң төрээн чуртун кайы хире билиринге, харын-даа школаларга география кичээлдериниң санын көвүдедиринге салдарны чедирип болур. Тывада болгаш өске-даа регионнарда диктантыга белеткел чоруп турар. Кызыл хоорайга ону Тываның күрүне университединге чорудар кылдыр шилип алган. 

 Елена Ондар, ТывКУ-нуң бойдус-география факультединиң деканы: «Күзелдиг кижилерни шуптузун чалап тур бис. Баш бурунгаар ТывКУ-нуң кол корпузунда 3-03-92 телефон дамчыштыр азы бойдус-география факультединиң 306 дугаар өрээлге келгеш, бүрүткедип алыр. Диктант үш кезектен тургустунган: бирги кезээ - бижимел ажыл, ийиги кезээнде онаалгалар кирген, үшкү кезээнге – «Россия – мээң чуртум» деп темага эссе бижиир. Мультимедийлиг дериг-херексел-биле онаалгаларны көргүзер, Тываның билдингир кижилери, билдингир географтар сөзүглелди номчуур». 

 Киржикчи бүрүзү бодунуң түңнелдерин анкетада дугаары езугаар ОГН-ниң сайтызындан көрүп ап болур. Бүгү-российжи диктантының түңнелдери география адырында чаа өөредилге стандартын тургузарынга идиг болур. 

 Орус географтыг ниитилелдиң ийиги фестивалы-биле октябрьның 30-ден ноябрь 8-ке чедир Москвада Чурукчуларның төп бажыңынга бирги бүгү-российжи география диктантызын чорудар. Ооң дугайында ОГН-ниң штаб-квартиразынга парлалга конференциязында ОГН-ниң президентизи Сергей Шойгу дыңнаткан.