Сочиге Тываның Баштыңы Дмитрий Медведевке ужурашкаш, регионнуң хөгжүлдезиниң талазы-биле хемчеглерниң боттанылгазын дыңнадып, деткимче дээш өөрүп четтиргенин илереткен

 «Сочиге Экономиктиг форум үезинде РФ-тиң Чазааның Даргазы Д. А. Медведев-биле ужураштым, Тываның чонунга ооң байыр чедириишкинин дамчыдып тур мен» - деп, «Сочи-2015» делегей чергелиг инвестиция форумунуң түңнелдериниң дугайында бодунуң блогунда Тываның Баштыңы Шолбан Кара-оол дыңнаткан. Регионнуң удуртукчузу эптиг үе аразында чурттуң чазааның даргазы-биле ужурашкаш, Дмитрий Медведевке деткимчези дээш, ылаңгыя Тываның социал-экономиктиг хөгжүлдезиниң талазы-биле хемчеглер дугайында айтыышкынга атты салганынга республиканың адындан өөрүп четтиргенин дамчыткаш, кылдынып турар ажылдарны чугаалаан. 

 Тываның девискээринде улуг дээн инвестиция төлевилелдерин моон-даа соңгаар сайзырадырынга, республиканың кол адыры – мал ажыл-агыйын көдүреринге, регионнуң энергетиказының айыыл чок чоруунуң, транспорт болгаш социал инфраструктураның чидиг айтырыгларын шиитпирлээринге федералдыг чазактан деткимчени көргүзерин айыткан, ниитизи-биле 18 пункт кирген айтыышкынга бо чылдың апрель 17-де ат салдынган. 

 РФ-тиң Чазааның бурунгаар сорулгаларга ат салганы документ үр болбаан-даа болза, федералдыг ведомстволар база регион эрге-чагыргазының кады күжениишкиннери-биле ол күүсеттинип эгелээн. Республика найысылалында аэропорт комплекизиниң эде тудуушкуну, М-54 федералдыг автомагистральдың чаа маршрудун эде угландырарының баштайгы ажылдары доозулган болгаш боттанып эгелээн.