«Сочи-2015» инвестиция форумунда Тываның Баштыңы РФ-тиң үлетпүр болгаш садыг сайыды-биле кады ажылдажылга дугайында керээге атты салыр

 Тываның Баштыңы Шолбан Кара-оол «Сочи-2015» инвестиция форумунда киржип турар. Октябрь 2-де РФ-тиң адырлар сайыттары, регионнар удуртукчулары болгаш улуг дээн российжи компанияларның удуртукчулары киришкен ажыл-агый программазы эгелээн.

 «Өзүлде ам-даа уламчылаар. Россияга стратегиялар» кол пленарлыг хуралга Россияның Чазааның даргазы Дмитрий Медведев киржир. «Сочи-2015»-тиң сайгарылгазында кирген кол темалар - Россияда экспорт курлавырының болгаш импортту солуурунуң, чурттуң саң-хөө рыногунуң хөгжүлдези болгаш российжи экономиканың тургузуун өскертириниң айтырыглары болур.

 Россияның 79 региону боттарының төлевилелдерин таныштырар, 40 хире чурттар, оларның аразында Абхазия, Великобритания, Германия, Франция, Казахстан биле Украина эң хөй киржикчилиг делегецияларны чоруткан. Форумда 8,5 муң киржикчи бүрүткеткен. 

  Тываның Баштыңы Шолбан Кара-оолдуң планында РФ-тиң үлетпүр болгаш садыг сайыды Денис Мантуров-биле үлетпүр политиказының адырында болгаш садыг ажыл-чорудулга адырында политиказында кады ажыл-чорудалга дугайында Россия Федерациязының Үлетпүр болгаш садыг яамызы биле Тыва Республиканың Чазааның аразында керээге атты салыры көрдүнген.