«Сайзырал» рыногу көдээден сайгарлыкчыларга садыгланыр черни халас берип турар

 Эрткен субботада, сентябрь 5-те, «Сайзырал» көдээ ажыл-агый рыногунга Сүт-Хөл, Тожу биле Чаа-Хөл кожууннар боттарының продукциязын делгеп, саарганнар. 

 Садыглаашкындан кирген орулга 259,2 муң рубль акша болган. Аңаа Сүт-Хөлден - 12, Чаа-Хөлден – 2, Тожудан – 2, шупту 16 сайгарлыкчы киришкен. Ярмаркадан найысылалдың 3 муң хире чурттакчылары садыгланган. Экономика яамызы садып алыкчыларның санының эвээжээнин, Кызылдың Иркутская кудумчузунда суббота санында болуп турар көдээ ажыл-агый ярмармазы чергелештир чоруп турарында дээрзин айыткан. 

  «Сайзырал» рыногунда продукцияның өртээ рынок өртээнден оранчок чиик. Чижээлээрге, бир кил Тожу кадыргызы - 230 рубль, Сүт-Хөлдүң хоюнуң эъди килде - 250 рубль, инек эъди -180 рубль. Субботада Чаа-Хөл кожууннуң төлээлери чиңге-тараа биле «Ажыг-Суг» аржаанын эккеп сатканнар. Эм үнүштери болгаш янзы-бүрү каттардан кылган вареньелери шак-даа четпейн, төндүр саттынган.

 Ярмарканың бир сорулгазы – көдээ ажыл-агый продукциязының бүдүрүкчүлеринге халас садыгланыр черлерни тускайлаары, чонга таарымчалдыг өртек-биле аъш-чем аймаан садары. «Сайзырал» рыноктуң администрациязы көдээ черден сайгарлыкчыларга неделяның субботага чедир неделя дургузунда төлевир чокка садыгланыр черни тускайлап турар. 

 Бо чылдың апрельден бээр дыштаныр хүннүң рыногунда сайгарлыкчы чоруктуң 200 хире субъектилери боттарының бүдүрген барааннарын 3 млн. ажыг рубльге садып-саарып алганнар.

 Ам график езугаар азы 2015 чылдың сентябрь 12-де Каа-Хем биле Таңды кожууннар боттарының продукциязын садар.