Тыва Арат Республиканың эки турачыларынга төөгүлүг сактыышкынның болгаш алдар адының хүнүн Тывага бир дугаар демдеглээр
27.08.2015
Фронтуже тыва кавалерийжи эскадронну аъткарган хүн – төөгүлүг сентябрь 1-ни республика Баштыңының чарлыы-биле Тыва бир дугаар демдеглеп эрттирер. Төөгүлүг хүнге тураскааткан хемчеглер август 28-те эгелээр: тыва эки турачыларның ады-биле адаан найысылалдың 13 кудумчузунга ында чурттап турар чуртакчыларны эвилелдеп, арыглаашкын акциязын аныяктар чорудар.
Август 31-де Тиилелге шөлүнде тураскаалга боодал чечектерни салып, митингини эрттирер. Ол-ла хүн Улусчу чогаадылга бажыңынга аянныг номчулгалыг база викториналыг «Ажык микрофон» хөгжүм-чогаал акциязы эртер.
Сентябрь 1-де, Билиглер хүнүнде, Тываның бүгү школаларынга темалыг байырлыг чыскаалдар, Тыва Арат Республикадан фронтуже аъттанган Ада-чурттуң Улуг дайынының дайынчыларының салгалдарының киржилгези-биле «Тайбыңның кичээлдери» болур. Эки турачыларның салгалдары фашизмни тиилээр дээш боттарның күжүн берген кырган-ачаларының, ачаларының дугайында сактыышкынны кылыр.
Дайын чылдарында Тываның чурттакчыларының киржилгезиниң дугайында төөгүлүг барымдааларны көргүскен темалыг шөлдү «Кызылдың Арбадынга» тургузар. Алдан-Маадыр аттыг национал музейге «Тиилелгениң салюду!», «Тыва – шупту чүвени Тиилелге дээш!», «Тиилелгениң хүнү!» культура-өөредиглиг программаны чорудар. Ада-чурттуң Улуг дайынында тыва эки турачыларның киржилгезиниң талазы-биле «төгерик стол» киржикчилерни ТР-ниң Күрүне архивинге манаар. Ооң-биле чергелештир «Сактыышкынның блгаш кажыыдалдың фильми», «Шериг хроника» фильмнерни көргүзүп, тыва дайынчыларның фоточуруктары болгаш шын архив документилери-биле таныштырар.
Тыва Арат Республикадан эки турачыларга сактыышкынның болгаш алдар-адының хүнүнге тураскааткан байырлыг хемчеглерни муниципалдыг тургузуглар организастаар. Тыва эки турачыларны мөңгежидериниң кол сорулгазы – российжи күрүнениң болгаш төрээн республиказының төөгүзүнге билигни болгаш хүндүткелди бээри, аныяк-өскенни патриотчу чорукка, бодунуң өг-бүлезинге, суурунга, Төрээн чуртунга харыысалгага болгаш камныг хамаарылгага кижизидери.
Тывадан дайынче аъттанган дайынчы бүрүзүнүң дугайында шынныг болгаш боттуг медээлерни чыыр дилээшкин отрядын Тываның күрүне университединиң төөгү факультединиң баазазынга тургусканы – база бир кол чүүл болган.
Возврат к списку
|