Тываның Чазаа аңдарылган Ми-8 вертолеттуң будундуларын көдүртүр ажылдарны акшаландырган

 Эрткен чылдың октябрьда аңдарылган Ми-8 вертолеттуң кезектерин сөөртүп эккээри-биле «ЮТэйр» компанияның Ка-32 агаар суднозунуң ачы-дуза чедирилгезин төлээринге 5 млн. 451,6 муң рубльди Тываның Чазааның курлавыр фондузундан аңгылап, республиканың орук-транспорт комплекизиниң яамызынче шилчиткен. 

 ТР-ниң Орук-транспорт яамызы, акша-хөреңгини шуптузун авиакомпанияже шилчиткен, Тывада агаарның байдалын көрүп, вертолет август 26-27-де ужуп кээрин дыңнаткан. Керээде дугурушканы-биле МИ-8 вертолеттуң бузундуларын айыыл-халап болган черден көдүрткеш, авторукка чедирер, оон ыңай автомашиналарга чүдүргеш, Кызылга эккээр. Амгы үеде республиканың ОБЯ ажылдакчылары аңдарылган вертолеттуң кезектерин көжүреринге техниктиг белеткелди чорудуп турар.

  Амдыызында 13 кижиниң мөчүзү тывылган, чок болган кижилерниң тодаргай саны генетиктиг экспертиза соонда тодараттынар. Рейсче 12 кижи бүрүткеттингенин, оон аңгыда бүрүткел чок ийи пассажир база бар деп медээлер барын сагындыраал. Багай агаардан даг ийинге үскеш, айыыл-халапка таварышкан Ми-8 вертолеттуң бузундуларын 10 ай эрткенде, республиканың найысылалындан 100 км-де, Тожу биле Кызыл кожууннарның кызыгаарында Улуг-О хемниң бажындан тыпкан.