Тывада Россияның Күрүне тугунуң хүнүн улусчу байырлал-биле демдеглээн!

 Албан езузунуң хүнүн республикага байырлал чыскаалы-биле эгелээн. Ону Тываның эрге-чагырга органнарының төлээлери, Тывада кол федералдыг инспектор баштаан. Кызылдың Национал парыгындан төп шөлге чедир улус ажыл-агыйының болгаш социал адырның ажылдакчылары российжи триколорну тудуп алгаш эрткен. 

Улусчу чыскаалдың кежигүннери үш аңгы өңнерлиг чурттуң күрүне сүлделери - улуг-бичии российжи туктарны, өңнүг шарларны тудуп алгаш, байырлалды каастаан. Республиканың кадык камгалалының 100 эрлериниң тутканы 40 метр российжи тук байырлалдың кол утказын илереткен. Оларның соон дарый ак-көк-кызыл өңнүг пөстен тукту киискиткен автомашиналар колонназы чыскаалды уламчылаан. 

  Федералдыг структураларның территориалдыг органнары: Россияның Пенсия фондузунуң ТР-де салбырының, РФ-тиң ТР-де ИХЯ-зы, РФ-тиң ФМАС ТР-де эргелели, федералдыг казначейство эргелели, Росхерегхайгааралдың ТР-де эргелели болгаш өске-даа черлерниң ажылдакчылары байырлал чыскаалынга киришкен.

  Күрүне тугунуң хүнүнде Дөгээ дааның кырынче үнүүшкүннү база кылган. Аныяктар шимчээшкининиң баштыңнары, аныяк спортчулар дагның шыпшыынга 7 метр тукту киискиткен. Арат шөлүнге байырлыг митингиге киржип турганнар Россияның тугун көргеннер. 

 Ол-ла хүн республиканың Чазааның бажыңының мурнунга 18 метр бедикче тук азар черлерниң ажыдыышкыны болган. Айыыл чок чоруктуң федерелдыг албанының ТР-де Кызыгаар эргелелиниң начальниги Евгений Трухановтуң командазы-биле байырлыг чыскаалга РФ-тиң АЧФА-ның ТР-де Кызыгаар албанының эргелелиниң, ТР-де ИХЯ-ның, РФ-тиң ОБЯ-ның ТР-де КЭ-ниң, ТР-де РФ-тиң ККФАЭ-ниң, ТР-де РФ-тиң СПФАЭ-ниң ажылдакчылары, «Дайынчы акы-дуңма» хөй-ниити организациязының, Десанчылар эвилелиниң төлээлери база киришкен.  

 Россия Федерациязының ыдык ырызы-биле российжи ак-көк-кызыл тукту, Тыва Республиканың ыдык ырызының адаа-биле сарыг-ак-көк тыва тукту көдүрген. 

 Россия биле Тываның күрүне туктарының флагштоктарын тургускан онзагай болуушкун-биле байырны чедирген. Чыглып келгеннер республиканың төөгүзүнде чаа езулалдың эгези салдынганын дыңнаткан: «Тываның Баштыңы хамааты бүрүзүнге чурттуң болгаш бистиң республиканың күрүне демдектеринге онза хүндүткелдиң кижизидилгезиниң дугайында чугааны чаңгыс эвес удаа көдүрүп келген. Ооң даалгазы-биле ийи 18 метр бедик флагштоктарны тургускан. Ооң-биле кады чаа, чараш болгаш онза чугула езулалдың эгези салдынган. Ам республиканың Чазааның чанынга, хүннүң-не Президентиниң кадет училищезиниң, республиканың школа-интернадының, найысылал школаларының кадет класстарының өөреникчилери туктарны көдүртүр» - деп вице-премьер Анатолий Дамба-Хуурак чугаалаан. 

 Байырлыг болуушкунга ТР-ниң Дээди Хуралының (парламент) даргазы Каң-оол Даваа, ТР-де Кол федералдыг инспектор Владимир Останин, «Чаңгыс демниг Россия» РПП Тыва парламентиде фракцияның удуртукчузу, депутат Виктор Глухов киришкеннер. 

 Российжи туктуң байырлалы найысылалдың уран чүүл коллективтериниң, Орус культура төвүнүң база Тыва культура төвүнүң артистериниң концерти-биле доозулган.