"Кызыл – Курагино» археология-географтыг экспедицияга делегейниң 50 чуртундан 2,5 муң ажыг аныяк волентер-шинчилекчилер киришкен

 ОГН-ниң 170 чылынга тураскааткан байырлыг хүлээп алыышкында Орус Географтыг ниитилелдиң президентизи Сергей Шойгу ону дыңнаткан. 

 "ОГН улуг дээн төлевилелдериниң бирээзи – «Кызыл – Курагино» делегей чергелиг археология-географтыг экспедицияның дугайында чугаалаар апаар. 2012 чылдан бээр аңаа делегейниң 50 чуртундан 2,5 муң ажыг волентер-шинчилекчилер киришкен» - деп С.Шойгу айыткан. 

 Тыва Республика биле Красноярск крайны харылзаштырган 400 километрде шөйүлген демир-орук тудуунуң зоназында культура-төөгү өнчү-салгалының объектилерин камгалаары - «Кызыл-Курагино» археология-географтыг экспедицияның сорулгазы. Казыышкыннар үезинде эртемденнер болгаш волентерлар муң хире кайгамчык археологтуг тывыштарны тыпкан. 

 ОГН-ниң президентиниң чугаазы-биле, 2015 чылда Бүгү чоннарның географтыг эвилелиниң делегей чергелиг география олимпиадазы Россияга бир дугаар эрткен. «Орус географтыг ниитилел дыка хөй чылдарның дургузунда российжи команданы тускай грантылар-биле деткип турар. Бистиң чыынды командавыстың кежигүннери – ада-чурт географиязының келир үези» - деп, ОГН-ниң президентизи демдеглээн. 

 2013 чылдан бээр Орус географтыг ниитилел даштыкы чурттарның аныяк специалистери киришкен аныяктарның чайгы школазын эрттирип турар. "Франция, АКШ, Нидерланды, Австрия болгаш өске-даа күрүнелерден ат-сураглыг географтар болгаш аян-чорукчулар оларга лекцияларны номчуп турар» - деп С.Шойгу немээн.