Тывада ийи өг-бүле эзиртир суксун чок куда найырын эрттирген

 Август 6-да Кур-Чер суурда Артыш Монгуш биле Инга Има база Орлан Саая биле Таира Кыргыс аныяктар тыва ужур-чаңчылдар-биле эрттиргени куда найыр дою уттунбурбас болуушкун болган. Өгленишкен аныяктарны шөлде тиккен аккыр өглерде ада-иелери ак кадактыг, сүттүг шайы-биле уткуп алган. 

 Аныяктарга ак кадактар-биле хол баглаары, келин кыстың чажын ийи чара өрүүрү, чартыктажыры, йөрээл сөстер дамчыдары дээн ышкаш тыва чаңчыл ужурларын сагаан. Өг-бүле болганының шынзыдылга бижиин ап, билзектерни солушкан соонда, Мендельсолнуң вальзын салгын-биле кады чергелештир самнааннар. Чаа өг-бүлени республиканың ХБАБ органының ажылдакчылары бүрүткеп, өг-бүле болганының кол документизи – херечилелди тывыскан.

 Кур-Чер суурга эрткен бо куда найырының кол онзагайы – эзиртир суксун аймааның шуут чогу. Өгбелерниң бурунгу ужур-чаңчылындан алырга, 20 градус дыңзыг тыва сүт арагазын чүгле 40 хар четкен кижи амзаар чораан. Ынчангаш Тываның Баштыңының Тывада бо чылын чарлааны Улусчу ужур-чаңчылдар чылын куда-дой эрттирер дээн аныяктар деткип, байырлыг хемчегни арага аймаа чокка эрттирген. 

 Тыва Республиканың Дээди Хуралының (парлементизиниң) даргазы Кан-оол Даваа бадылашкан аныяктарга байырны чедирип, чонунуң ужур-чаңчылдарын болгаш культуразын катап эгидип, ону кадагалап арттырар дээш өскелерге көргүскен үлегерлиг чижээн онзалап демдеглээн.