Тывада кадыкшылга лагерьлериниң фестивалы эгелээр

 Август 11-де «Байлак» ургалар лагериниң баазазынга республиканың мурнуу кезээнде кадыкшылга лагерьлериниң «Чагытай өңнүктерин уткуп тур» деп фестиваль эртер. 

 Аңаа Эрзинниң «Отчугаш», Тес-Хемниң «Сайлык», Улуг-Хемниң «Чодураа», Чеди-Хөлдүң «Металлург», Тыва Республиканың Өөредилге яамызының «Юность», Тыва Республиканың Өг-бүле болгаш уруглар херектериниң талазы-биле агентилелдиң «Байлак», Тыва Республиканың профэвилелдер федерациязының «Чагытай» и «Орленок» лагерьлери киржир.

 ТР-ниң Өөредилге болгаш эртем яамызының эгелээни Улусчу ужур-чаңчылдар чылынга тураскааткан «Найырал улуг болза, Төрээн чурт быжыг» деп кыйгырыгның адаа-биле эртер кадыкшылга лагерьлериниң фестивалы республика девискээринде чурттаан чоннарның культуразы болгаш ужур-чаңчылдары-биле таныштырар. Июльдуң 28-29-та Ак-Довуракта «Таежный» УКЛ ындыг хевирлиг «Таежный өңнүктерин уткуп тур» фестивалынга Бай-Тайга, Мөнгүн-Тайга, Чөөн-Хемчик кожууннар биле Ак-Довурак хоорайның лагерьлери киришкен. 

 Бо удаада фестивальды эрттиреринге белеткел ажылдарын чорударын, киржикчилерни изиг чем-биле хандырарын «Байлак» лагериниң начальнигинге дааскан, ОШАЧКИ-ге уругларны аай-дедир чедиреринге үделгени, муниципалдыг органнарның өөредилге эргелелдериниң удуртукчуларынга орукка чорда эмнер аптечказы, кургаг хүнезин-биле хандырарын, изиг чем дээш уруг бүрүзүнге 150, улуг кижилерге 200 рубль түңнүг акша үндүрерин саналдаан.