Тываның Баштыңынга «Даа кожууннуң 250 чылы» юбилейлиг медальды тыпсып, алдын сүлде демдектиг бөрттү белекке берген
25.07.2015
Чөөн-Хемчик кожууннуң чагырга даргазы Байбек Монгуш Тыва Республиканың Баштыңынга кожууннуң хөгжүлдезинге киирип чоруур үлүг-хуузу дээш Даа кожууннуң 250 чылы» юбилейлиг медальды тывыскан. Республиканың сураглыг мөгелери тыва хүрешти сайзыралынга деткимчени көргүзүп чорууру дээш, республика баштыңынга онзагай белек – алдын болгаш чартык үнелиг даштардан Тываның сүлдезин сиилбээн тыва национал бөрттү сунган. Бөрт-биле кады мөңгүн эдилелдер астаан, алдын сүлде демдектиг хөм курну база сөңнээн. Ол белектерни тыва күрүнениң үндезилекчизи Монгуш Буян-Бадыргының салгалы, мөге Владимир Комбуевич Монгуш тудускан.
Чазак даргазы Шолбан Кара-оол ындыг белектер дээш четтиргенин илереткеш, бөрт биле курну кеткеш, кайгамчык белектерни музейге дамчыдарын аазаан.
Шолбан Кара-оол мөгелер-биле байырлал шайын аартап ора, уруглар болгаш аныяктар ортузунга амыдыралдың кадык овур-хевирин, тыва чоннуң езу-чаңчылдарын, үнелиг мөзү-бүдүш шынарларын суртаалдап чоруурун дилээн. Хүрештиң сылдыстары – дыка хөй аныяк кижилерге езулуг үлегерлиг чижек. База ол ышкаш хүрештиң хоочуннарынга хүндүткелди илередип, онза кичээнгейни углап чоруурун чагаан. «Оларны кажан-даа утпаңар. Хоочуннар-биле доктаамал харылзажып, хүрештерге хүндүткелдиң езулалын көргүзүп чоруңар. Улугларны хүндүлеп, оларны дыңнап чоруур чараш чаңчылывысты катап эгидип, салгалдарга дамчыдаалыңар» - деп ол чугаалаан.
Возврат к списку
|