Тываның Баштыңы «Үстүү-Хүрээ» фестивалының майгыннар хоорайжыгажынга четкен

 Тываның Баштыңы Шолбан Кара-оол бөгүн Чадаана хоорайда «Үстүү-Хүрээ» дириг хөгжүмнүң болгаш чүдүлгениң бүгү-делегей фестивалының майгыннар хоорайжыгажынга четкен. Оргкомитеттиң удуртулгазы-биле ужурашкаш, фестивальдың киржикчилери болгаш аалчылары-биле танышкан.

  Төлевилелдиң удуртукчузу Игорь Дулуш билдингир хөгжүмчүлер республикада келгенин, фестиваль ажылын эгелээринге беленин дыңнаткан. Новосибирск облазы, Красноярск край, Москва, Санкт-Петербург, Нью-Йорктан дээш, 40 хире чогаадыкчы коллективтер бүрүткеткен. Оларның аразында Кызылдан, республиканың ыраккы суурларындан коллективтер база бар. 

  Хүндүлүг аалчыларның аразында «2015 чылдың гитаризи»» бүгү Америка конкурузунуң тиилекчизи, «Блюзтуң хааны» национал конкурстуң ийи дакпыр лауреады (2006, 20007), Фрэнк Синатра биле Джими Хендрикстиң өөреникчизи, гитарист, ыраажы, шоумен Алвон Джонсон; Дубнодан Юриң Льноградскийниң «МузЭнергоТуру» бар. 

 Четверг эртенинде Россияның хоорайларындан база Чили, Аргентина, Бразилия, Голландия, Франциядан 850 киржикчи бүрүткеткен. Тыва хамнарының чалалгазы-биле Мурнуу Көреядан келген хам Ким Джон Хи Тываның Баштыңынга байырны чедирген. «Силерде мында кижилер дыка ээлдек-тир, фестивальга улуг кичээгейни салып турар-дыр силер» - деп, Шолбан Кара-оолга ол чугаалаан.

 Аалчыларның бирээзи республиканың баштыңынга тибет хөгжүмнүг аякты тудускан.

 Парижтен келген аалчылар фильмни тыртырп эгелээн.

 Майгын лагериниң девискээринде суй-белектер садар садыг точкаларын тургусканы аалчыларга эптиг. 

  «Үстүү-Хүрээ» аяңын интернационалчы сагыш-сеткил база катап бүргей алган, а Чөөн-Хемчик кожууннуң чурттакчылары хөгжүм байырлалын эгелээринге белен!

 «Үстүү-Хүрээ» — Россияның аңгы-аңгы черлеринден болгаш даштыкыдан төлээлерни чыгган амыдыралга херек хөгжүмнүң байырлалы-дыр деп, журналистер санап турар.

 Тываның Баштыңы Шолбан Кара-оол кижи бүрүзүнге эки сеткил-хөөнү күзээш, катап база чедип кээрин аазаан. «Үстүү-Хүрээниң» майгыннар хоорайжыгажындан улаштыр, кожуун төвүнден ырак эвесте чаттылган өглер хоорайжыгажында малчыннар-биле ужуражып чорупкан.