Тергиин шыдыраачылар

Эрткен неделяда Иштики херектер яамызының иштики херектер килдизиниң бирги чери дээш хөл-шыдыраага команда аайы-биле маргылдаа найысылалдың «Сүбедей» спорт ордузунга болуп эрткен. Маргылдааны иштики херектер килдизиниң хоочуннар эвилелиниң даргазы, халажылгада полковник Марат-оол Идамович Ондар эрттирген.
     Хөл-шыдыраа маргылдаазынга ниитизи-биле 7 команда киришкен. Аңаа Таңды, Чөөн-Хемчик, Барыын-Хемчик, Кызыл кожууннарындан, Кызыл хоорайдан база суд приставтарындан командалар долгандырыг чурум-биле ойнаан. Ооң түңнелинде, Чөөн-Хемчик кожууннуң командазының ойнакчылары Артур Дажыевич Монгуш биле Сергей Ыймажапович Тюлюш олар тиилекчи болган. 2-ги черни Кызыл хоорайдан хөл-шыдыраага спорт мастери Евгений Михайлович Быков (чагаалажып ойнаар маргылдаага) биле хөл-шыдыраага спорт мастеринге кандидат Владимир Ильич Гребенкин оларның командазы алган. А 3-кү черге Барыын-Хемчик кожууннуң командазының ойнакчылары хоочун шыдыраачы Далай-оол Тенекович Саая биле Алексей Дондук-оолович Кара-Сал төлептиг болган. Хоочун шыдыраачылар Даш-оол Кыстаевич Ондар биле Константин Хурагалдаевич Ооржактың эки оюнун демдеглээн.

Анджела Куулар, маргылдааның кол секретары.