Россияның Спортчу хүреш федерациязының президентизи спортчуларның белеткелин хандырарынга үлүг-хуузу дээш Тывага өөрүп четтиргенин илереткен

 Тываның Баштыңы Шолбан Кара-оолдуң адынга Россияның Спортчу хүреш федерациязының президентизи Михаил Мамиашвилиден телеграмма келген. Ында профессионал спортчуларны белеткээринге үлүг-хуузу дээш өөрүп четтиргенин илереткен.

  «Онза хүндүткелдиг Шолбан Валерьевич! 2015 чылдың июнь 23-28 хүннеринде Стамбул хоорайга Европаның бирги чери дээш грек-рим, хостуг болгаш элээдилер ортузунда херээженнер хүрежинге Россияның спортчулары 8 алдын, 3 мөңгүн база 3 хүлер медальды чаалап ап, чайынналчак чедиишкинни көргүскен. Хостуг хүреш мөгелериниң тиилекчилер аразында, 60 кил деңзиге алдын медальды чаалап алган Кызылдан Начын Куулар бар. 

 Россияда болгаш Тывада спортчу хүрешти хөгжүдер айтырыгларга сагыш човаашкынныг киржилгеңер болгаш Россияның чыынды командазының кежигүннери спортчулары белеткээрин хандырарынга киирип турар улуг үлүг-хууңар дээш сеткилдиң ханызындан өөрүп четтиргенивисти илереттивис. Хүндүткел-биле, Федерацияның президентизи М. Мамиашвили» - деп телеграммада бижээн.