Тыва биле Россияның демнежилгезин бүгү Сибирьге байырлаар

Тыва биле Россияның чаңгыс демнежилгезиниң 100 чылынга уткуштур «100 чылче базымнар» төлевилелдиң удуртукчуларының бирээзи, культура яамызының сайыды Вячеслав Доңгак-биле ужуражылга үезинде бо байырлалды бүгү Сибирьге байырлап эрттирериниң талазы-биле ажылдарны чорударын Тываның Баштыңы Шолбан Кара-оол саналдаан. «Федерация ужур-уткалыг байырлалга белеткелде ону өске девискээрлерге байырлап эрттирериниң хемчеглери эвээш, чүгле Москва болгаш Москва чоогу-биле кызыгаарлаттынган – деп, Шолбан Кара-оол чугаалаан.– Россияның чоннарының чоокшулажыышкыны ооң кыдыг-кызыгаар девискээрлеринден эгелээш, оларның аразында найырал быжыккан. Ынчангаш Тыва биле Россияның чаңгыс демнежилгезиниң 100 чыл байырлалы хакастар, алтайлар, краснояржылар дээш, Сибирьниң өске-даа девискээрлерде шупту чоннарның база байырлалы болур ужурлуг, чүге дээрге бистер оларның-биле чүгле экономиктиг эвес, культура болгаш дөгүл-төрел харылзааларлыг бис. Чоннарның аразында харылзааларны Тыва биле Россияның байырлалы-биле база байыдар ужурлуг бис».
    Чазак Даргазының бодалы-биле алырга, Тыва дээрге Россияда культура болгаш төөгү талазы-биле онзагай девискээр, байырлал үезинде өске чоннарга тываларның бараалгадып болур чүүлдери хөй, тыва хөөмей-сыгытты океан кежир Америкада, ыя бо Новосибирскиге бодаарга, эки билир. Россияның Азийжи культурлуг төвү деп санаттырар арга Тывада бар.