Соңгукчулар идепкейлиин көргүскен

Тывага 11.20 шакта 16 хуудан хөй соңгукчулар барып бадылаан. Республиканың соңгулда комитединиң медээзи-биле, эртенгиниң 10 шакта Тыва Республиканың Дээди Хуралының (парламентизиниң) ийиги чыыжының депутаттарын соңгуурунга 27 387 соңгукчулар, азы даңзыже киирген чоннуң ниити түңүнден 16,12 хуузу кээп киришкен.

16,12 хуунуң ниити түңүнден 9,31-и хуусаа бетинде соңгаан­нар. Олар дээрге колдуунда ырак турлагларда чурттап турар малчыннар база ол ышкаш чоокта чаа төнген юбилейлер таварыштыр келген, өске хоорайларда өөренип турар элээн хөй сургуулдар. Тоорук сезону келген болгаш, тайга эдээнде  кожууннарда тывыштар дээш аргаларже чоруп турар чурттакчы чон база хуусаа бетинде бадылаан.

16 соңгулда округтарындан Бии-Хемниң хамаатылары 30,40 хуузу кээп соңгуп, идепкейлиин көргүскен. 28,42 хуу соңгукчулар Бай-Тайга округунуң участоктарынга келген. Чөөн-Хемчик, Кызыл болгаш Каа-Хем округтарында келген улус саны 20 хуулардан хөй болган.

Кызылда тургускан 6 округтан Первомайский округу эң-не идепкейлиин көргүзүп, 17,25 хууга чон кээп соңгаан.

«Соңгулдалар чогумчалыг ажылчын чурумга эрткен. Шупту соңгулда участоктары доктааттынган үезинде 8.00 шакта ажыттынган. Участок бүрүзүнде политиктиг партиялардан болгаш хөй-ниитиниң эвилелдеринден база ол ышкаш массалыг информация чепсектериниң төлээлекчилеринден тургустунган хайгааракчыларның ажылдаарынга таарымчалыг байдалдарны тургускан. Соңгукчуларның кээп турарынга хамаарыштыр чугаалаар болза, суурларда бадылааннар саны, хоорайга бодаарга, хөй болуп турар» – деп, республиканың соңгулда комитединиң даргазы Болат-оол Ондар бадылаашкынның чорудуун медеглээн.