Денис Аргоев "Маадырның партазы"

Бо хүн чурттувустуң база бир Маадырының чырык адынга тураскааткан хемчег Шагаан-Арыгның дугаары 1 школазынга болуп эрткен.

Иван Анатольевич, Надежда Чульдумовна Барнаковтарның оглу Денис эрге-чассыг өзүп, школага эки өөредилгелиг, хөй-ниитичи өөреникчи болуп өзүп келген.
Тускайлаттынган шериг операциязы эгелей бээрге, Денис Дмитриевич Аргоев бодунуң эр хүлээлгезин дидими-биле күүседип тургаш, маадырлыы-биле амы-тынындан чарылган.
Ооң төрээн школазынга бо хүн, апрель 27-де ,,Маадырның партазын" ажыткан. Школаның директору Ольга Васильевна Кистеева, Улуг-Хем кожуун чагыргазының база Шагаан-Арыг хоорай чагыргазының социал политика талазы-биле оралакчылары, өөредилге эргелелиниң методизи Денис Дмитриевич Аргоевтиң дугайында чылыг сактыышкыннарны чугаалаан.

Денис аажок шимченгир, хөглүг, дузааргак, эш-өөрзүрек оол болуп өскен. Школага өөренип тургаш спорт-биле өңнүктежип, хостуг хүреш, бокс бөлгүмнеринче барып турган. Хөгжүмге база салым-чаяанныг, танцы-самнаар, гитарага ойнаарынга ынак, сонуургалы улуг чораан.

Ол школа соонда Кызылдың политехниктиг техникумунче өөренип кирип алгаш, аңаа бир чыл өөренгеш, шериг албан хүлээлгезин эрттирер күзелин илереткеш, Ленинград облазында шериг кезээнге эр хүлээлгезин күүсеткеш келген.
Черле бодунуң сонуургалы шериг херээ-биле холбашкан турганындан
"Кузбасс" Сибир округтуң Национал гвардиязының 6607 дайынчы кезээниң 27-ги отрядының дайынчызы (спецназ) болуп турган. Ол шериг дайынчы кезекке бодунуң эрес-дидимин, шудургузун, сагылга-чурумнуун көргүзүп, хөй удаа шаңнадып, мактаткан.
Кажан 2022 чылда Россияга тускайлаттынган шериг операциязы чарлаттына бээрге, чайгылыш чок тура-соруу-биле киришкен. 2023 чылдың июнь 22-де дайынчы хүлээлгезин күүседип чорааш, амы-тынындан чарылган. Россия Федерациязының Президентизиниң Айыткалы-биле эрес-дидим маадырлыг чоруу дээш Денис Дмитриевич Аргоевке "Эрес-дидим чорук орденин" мөчээн соонда тывыскан.

Аныяк-чаш назынының чаа-ла 25-ки чылында амы-тынындан чарылган маадырлыг оглувустуң чырык ады чүректерге кезээ мөңгеде чылыг сактыышкын болуп артар.

«Улуг-Хем солуну», 2024 чылдың дөрт ай