Ол дугайын 2024 чылдың часкы шериг албан келдириишкининиң эгезинде болган брифингиге республиканың шериг комиссары Демир-оол Артына дыңнаткан.
«Шериг албан-хүлээлгезин эрттирер хар-назыны четкен российжи хамаатыларның часкы шеригже келдириишкини апрель 1-ден июль айның 15-ке чедир уламчылаар.
Бо чылдың январь 1-ден эгелээш шериг хүлээлгезин эртирер оолдарның назы-харын 30-харга чедир көдүрген. Эрткен чылын 27 харлапкан оолдарга ук хоойлу-дүрүм хамаарышпас.
Шеригже часкы келдириишкин уезинде Тыва Республиканың шериг комиссариадының чыылда черинден 700 ажыг оолдар шериг албан-хүлээлгезин эрттирери-биле чоруур деп планнатынып турар. Олар Россияның Чепсектиг Күштериниң шериг округтарында чадаг-шериг кезектеринге, агаар-космос салбырларынга, стратегтиг сорулгалыг ракета шериглеринге, агаар-десант күштеринге, национал гвардияга, демир-орук шериглериниң кезектеринге шериг хүлээлгезин эрттирерлер. Шериг албан-хүлээлгезин эрттирип турар оолдар тускай шериг операциязынга киришпес база Россияның чаа регионнарыңга шериг эрттирбес.» – республиканың шериг комиссары Демир-оол Артына.
Оон аңгыда, оолдарның кижи бүрүзүн шериг идик-хеп, чүү-хөө сугар несессер, «Мир» национал төлежилге системазының банк картазы, амы-хуунуң электроннуг картазы-биле хандырар.
Тыва Республиканың шериг комиссариады белеткээн