Кол-ла чүве, күзелдии-биле чоруп турар

Ноябрь 9-та Тыва Республиканың шериг комиссариады 2022 чылдың күскү келдириишкин кампаниязы-биле баштайгы 25 оолду шеригже аъткарган.

ТР-ниң шериг комисса­риа­дының шериг келдирииш­кининге белеткел ажылы чорудар килдистиң начальнигиниң хүлээлгезин күүседип турар Владимир Ондрак:

– Бөгүн 25 оолду шериг албан-хүлээлгезин күүседири-биле үдеп турарывыс бо. Олар Чөөн чүктүң шериг округунга Уссурийск, Свободный хоорайларга демир-орук шериг кезээнге шеригни эрттирер. Бо чоруп турар оолдар шериг кижиге көрдүнген бүгү-ле чогуур идик-хеп болгаш чедер черинге чедир орукка ап чо­руур бирги хереглелдиң херекселдери-биле бүрүн четчеленген. Оолдарның тура-соруу, хей-аъды бедик, кижи бүрүзү бодунуң эр хүлээлгезин билип турар болгаш күзелдии-биле чоруп турлар – деп демдегледи.

Байырлыг чыскаал бетинде оолдардан кандыг байдал-хөөннүг чоруп турарын сонуургап, кеткен идик-хеви чылыг бе дээрзин айтыра­рывыска, шупту чүве эки, идик-хевинге таарзынып турарын чугаалаар болдулар.

Батыр Түлүш, Шагаан-Арыг хоорайдан:

– Кандыг-даа коргуушкун чок шеригжи хөөннүг тур бис. Школа соонда шериг албанын эрттирер дээн бодум күзелим чүве. Шериглээш келгеш, келир үеде эрге-хоойлу органнарынга ажылдаары-биле мергежил шилип алыр деп бодап турар мен. Бис дээш дүвүревес болза эки – деп, шериг езузу-биле дүрген болгаш кысказы-биле чугаалады.

Батырның чанында чыскаалда турар өске оолдарның карактарында орлан-шоваа оттар хып турарындан оларның база тура-соруунуң бедии эскертингир болду. Эр кижини шериг хеп шыңгыы хевир киирер. Дүүнгү школа­чыларның бөгүн солдаттар апарганынга ада-иелери чоргаарланып, оларга ак орукту күзеп, үдээн.

Елена Иконникова, кырган-ава:

– Бөгүн бис мында уйнуум Иван Батуринни үдеп чедип келдивис. Бистиң Ванявыс шеригже дыка барыксаан, изиг күзели-биле чоруп турары бо. Чуртта ниити байдалды билип турар бис. Дүвүренчиг-дир. Ынчалза-даа шупту чүве эки болур дээрзинге бүзүрээр ужурлуг бис. Эр кижи бүрүзүнүң хүлээлгези, эртер оруу дээрзин уйнуум дыка эки билип турар. Мен аңаа чоргаарланыр мен. Бодум армян кижи мен, өөм ээзи орус омактыг, кеннивис тыва, оларның улуг оглун үдеп турарывыс бо. Черле ынчаш, бо тыва кеннивис дыка онза кижи. Ол үш оол, ийи кыс – беш ажы-төлүнүң ынак авазы, бистиң оглувус-биле эп-найыралдыг чурттап чорлар. Бистиң интернационалчы өг-бүлевисте азербайджан кижи база бар. Шупту мында чедип келген, үдеп турарывыс бо. Ынчангаш солдат оолдарывыска ак орукту, ада-иеле­ринге олар дээш сагышсыравайн, артык дүвүрел чок манаарын күзээр-дир мен – деп, шериг хеп кеткен уйнуун бир дугаар көрүп турар кырган-ава улуг чоргаарал-биле чугаалады.

Чаңчыл ёзугаар оларны үдээр байырлыг чыскаалга ТР-ниң Чазак Даргазының оралакчызы Тимур Куулар, ТР-ниң шериг комиссары Демир-оол Артына, ТР-ниң Адалар чөвүлелиниң даргазы Хонук-оол Монгуш, ТР-ниң Хоочуннар эвилелиниң даргазы Долгар Сагаан-оол, ТР-ниң Ада-иелер комитединиң даргазы Ульяна Нурсат болгаш оолдарын үдеп келген ада-иелер киришкен.

Тыва чонунуң ат-алдарын сыкпайн, шериг албан хүлээлгезин төлептиг эрттиргеш кээрин сөс алганнар шупту чугаалап, чагыг-сөзүн бергеш, орук-сууру менди-чаагай чедерин күзээн.

Карина МОНГУШ
Буян Ооржактың тырттырган чуруктары