Вадим Чыкай биле «ТШО-нуӊ Маадырлары» деп патриотчу класс шагы болуп эрткен
Декабрь 9-та Ада-чурттуӊ маадырларыныӊ хүнүн демдеглээр. Бо хүн Республиканыӊ К.И.Чуковский аттыг уруглар ном саӊынга эрес-дидим чоруктуӊ ордениниӊ Кавалери база хөй-ле шаӊналдарныӊ, медальдарныӊ эдилекчизи, сержант, Тыва Республиканыӊ чогаалчылар эвилелиниӊ кежигүнү, Тываныӊ ховар, эрес-дидим, төлептиг экер-эрес оолдарыныӊ бирээзи Вадим Окчаевич Чыкай-биле ужуражырылга солун болуп эрткен.
Өзүп орар салгалывыс Ада-чурт Маадырларыныӊ үлегер-чижээн көрүп өзер болзун дээш патриотчу класс шагын эртирип, хемчегниӊ киржикчилери кылдыр библиотеканыӊ активчи номчукчулары, келир үеде ада-чурттувустуӊ камгалакчылары - Республиканыӊ кадет корпустуӊ өөреникчилериӊ база кижизидикчи башкыларын Куулар Кежик Шолбан-ооловичти, Шалык Чимит Сайдашевичти чалаан.
Хүндүлүг аалчы Вадим Окчааевич бодунуӊ допчу намдары биле таныштыргаш, өскен-төрээн суурунуӊ дугайында, дайынчы эш-өөрүнүӊ эрес-дидим чоруунуӊ дугайында чугаалап, өөреникчилерге чагыг-сүмезин берип, олар-биле чугаалажып, эки өөренирин күзээн.
Ада-чурттуӊ маадырларыныӊ хүнүнде тыва маадырларывыска мөгейип турар бис. Оларныӊ аразында шылгараӊгай чангыс чер чуртуувус, Россияныӊ Маадыры, Тываныӊ езулуг патриотчу оглу Сергей Кужугетович Шойгуга болгаш өске-даа камгалакчыларывыска чоргаарланып, маадырлыы-биле чок болган тыва оолдарывысты сактып, чоргаарланып чоруур бис.
Маадырлыы-биле чок болган тыва маадырларга мөгейип, кажыыдалдыӊ минутазын чарлап, салым-чаяанныг чурукчу Балган Радомир Михайловичиниӊ чураан Маадырларныӊ портреттерин көргүскен.
2022 чылда февраль айда бо тускай шериг операциязы эгелээн болгай. ТШО-нуӊ кол сорулгазы – Украинада чурттап турар орус омактыг чоннуӊ төрээн дылынга чугаалажыр эргелерин камгалаары, православ чүдүлгелиг чонну кызагдаарын болдурбазы, фашист чорукту узуткаары болгаш украин шериглерниӊ Донецк болгаш Луганск республикаларда дайыынныг хөделиишкиннерин соксадыры.
2022 чылда база бир чангыс чер чурттувус РФ-ныӊ чепсектиг күштерининиӊ улуг сержантызы Мерген Очур-оолович Донгак ТШОнуӊ шөлүнге дайынчы эрес-дидим, быжыг чоруу дээш Россияныӊ маадыры деп атка төлептиг болуп, алдын сылдыс-биле шаӊнаткан. База бир Россияныӊ Маадырлары: Чалым Сюндюпович Чүлдүм-оол, Куулар Буян Федорович.
Амгы үеде мурнуку одуругларда бистиӊ чангыс чер-чурттугларывыс тулчуп турар, оларныӊ эрес-дидим, бедик көдүрлүүшкүннүг, хей-аъды бедик, чоргааралды оттуруп чорлар. Олар боттарынын дайынчы дангыраанга шынчы болуп, ада-чурт камгалаар шериг албан-хүлээлгезин төлептии-биле күүседип чоруурлар.
Улуг күчүлүг Ада-чурттувус Россия, Тыва Күрүневистиң, тыва чонувустуң чаагай келир уези дээш амы-тынын харамнанмайын демисежип турар шеригжилеривиске каӊ-кадыкшылды күзеп, ТШОнуӊ маадырларынга, төрээн чуртунуӊ камгалалынга улуг үлүүн демдеглевес аргавыс чок.
Ужуражылганы аалчы чогааткан «Солдат-тыр мен» деп шүлүү-биле дооскан.
Ногаан шокар шериг хепти кеткен даа бол,
Ногаандык дег дошкун кылдыр көстүр-даа бол,
Каржы сеткил кижилерге бодап көрбээн
Камгалакчы солдат-тыр мен, бүзүреп чор.
Улай адар октуг боону чүктээн-даа бол,
Бачыт кылбас, амытанга хилинчек чок
Багай эвес солдат-тыр мен, идегеп чор.
Өршээл билбес эжелекчи каржы дайын
Өскен чуртум туру базып,халдап келзе,
Өршээ бурган, мени ынчан танывас сен
Өлүр тутчур солдат-тыр мен, ынакшып чор!
Маадырларывыска эрес-дидим чоруун база катап бедии-биле үнелеп, тыва дайынчы кижиниӊ сүлдези бедик, оларныӊ маадырлыг чоруктары келир үеде аныяк өскенге үлегерлиг чижек болур деп чоргаарланып, демдеглеп, тыва дайынчы экер-эрес оолдарывыс тиилелгелиг чанып кээрин йөрээп база хүндүлүг аалчывыс Вадим Окчааевичиге ал бодунга кадыкшылды, өг-бүлезинге аас-кежикти күзеп, четтиргенивисти илередип, ажыл-ижиннерге депшилгени, чогаал ажылынга чайынналчак чедиишкиннерни хөй санныг номчукчуларывыстын мурнундан күзедивис!
