Тес-Хем кожуунга маадырларның чырык адынга тураскааткан хол бөмбүүнге маргылдаа болуп эрткен

Сорук-күштүг Соян чоннуң алдарлыг оолдары Ланаа Ай-Херел Лагаанович, Симчитмаа Мерген-Херел Борисович, Соян Сайдаш Кара-оолович тускайлаттынган шериг операциязының киржикчилери, кайызынга-даа мөчээн соонда тывыскан “Эрес-дидим чорук” деп хөрек демдээниң эдилекчилериниң чырык адынга тураскааткан кожуун чергелиг хол бөмбүүнге маргылдаага 11 команда киришкен.

Түңнелдери:

1-ги черде – О-Шынаа (шаңналы 21 000 акша);

2-ги черни шуурмак (шаңналы 14 000 акша);

3-кү черни Ак-Эрик (шаңналы 7 000 акша).

Симчитмаа Мерген-Херел Борисовичиниң өөнүң ишти 3 командага 10000 акшаны немей деткикчилээн.

“Тергиин аарыкчы” деп атка Чаймаа Адыгжы Анай-оолович төлептиг болган. Кежээ дургузунда дуңмаларынга дыка-ла аарыкчылады. Боостаазын тундур аарыкчылаан дээр болза, чазыг болбас. Улуг, биче аарыкчыларывыска шуптуңарга улуу-биле четтирдивис.

Дыка-ла чараш, солун маргылдаа болуп эрткен. Келген командалар чараш залывыс, школавысты, улустуң чурумнуун, аъш-чемниң элбээн, демниивисти магадаан. Маргылдааның бедик деңнелге эртип турарын командалар демдеглээн. Маадырларның ада-иезинге, чоок кижилеринге хол бөмбүүнүң ойнакчылары болгаш аарыкчыларының мурнундан черге чедир могейип, өөрүп четтирдивис.

Кызыл-Чыраа сумузунуң ортумак школазы белеткээн