Онзагай белектер

Россияның күрүне тугунуң хүнүн Тываның чурттакчылары чаңгыс чер-чурттуглар съездизиниң киржикчилери-биле кады демдеглээр. Олар кымнарыл дээрге Россияның болгаш делегейниң аңгы-аңгы булуңнарында чурттап чоруур Тыва чурттуг ат-сураглыг кижилер-дир. Оларның аразында — Россияның болгаш Тываның Улустуң артизи, Москваның күрүне филармониязының ыраажызы Надежда Красная. Ол өөнүң ишти концертмейстер, Тыва Республиканың уран чүүлүнүң алдарлыг ажылдакчызы  Вадим Федорцев-биле кады кээр. 

Ат-сураглыг ыраажы Тыва биле Россияның демнежилгезиниң 100 чылынга база ачазы Сергей Хочекович Красныйның мэр болуп ажылдап чорааны Кызыл хоорайның үндезилеттинип тургустунганындан бээр 100 чылының байырында чаңгыс чер-чурттугларынга белек кылдыр бодунуң концертин көргүзер деп шиитпирлээни ол. Россияның күрүне тугунуң хүнү — август 22-де Тываның В.Көк-оол аттыг хөгжүм-шии театрынга Надежда Краснаяның «Мээң ынак аялгаларым» деп концерти болур.

Республиканың чурттакчылары болгаш аалчылар август 22-ниң байырлалында Арат шөлүнге болур солун хемчеглерге киржир. Оларның иштинде — коляскалар чыскаалы, «Бистиң тугувус» концерт. Август 21-де Национал театрга чаңгыс чер-чурттуглар съездизинге тураскааткан джаз концерт болур, аңаа база бир онзагай белек — Россияның Улустуң артизи Даниил Крамер база Тываның Улустуң артизи Сайынхо Намчылак олар киржир.

Россияның күрүне тугунуң байырлалынга тураскааткан хемчеглер август айда Национал музейге, А.С.Пушкин аттыг библиотекага, «Найырал» кинотеатрынга  болуп эртер.