20 чылдың нүүрүнде

Казна албан чери

Июль 10-да ТР-ниң Чазааның Бажыңының хуралдаар залынга Тыва Республикада казна албан чериниң эргелелиниң тургустунганындан бээр 20 чыл болган юбилейинге тураскааткан байырлыг хурал болуп эрткен.

Аңаа федералдыг казна албан чериниң административтиг эргелелиниң начальниги Андрей Гурович, ТР-ниң садып алыышкын адырында контроль системазының таарыштырылга талазы-биле сайыды Юрий Килижеков, РФ-тиң федералдыг казна албан черлериниң девискээр органнарының удуртукчулары, ТР-ниң сайыттары, ТР-ниң Дээди Хуралының төлээлери  база республиканың казна албан чериниң хоочуннары, ажылдакчылары киришкен.

Хуралдың эгезинде ТР-ниң казна албан чериниң эргелелиниң удуртукчузу Солангы Саая Тывада казна ажыл-чорудулгазының төөгүзү,   хөгжүлдези база моон соңгаар сорулгалары-биле таныштырып, солун илеткелди кылган. Тываның Баштыңы Шолбан Кара-оолдуң өмүнээзинден байыр чедириишкинин Юрий Килижеков дамчыдып, республиканың экономиктиг сайзыралының база бир кол угланыышкыннарының бирээзи болуп турар адырның ажылдакчыларынга чедиишкиннерни, өг-бүлелеринге, чоок кижилеринге чүгле экини күзээн.

Тыва Республиканың казна албан черинде 300 ажыг кижи ажылдап турар, оларның 193-ү хөй чылдарда ак сеткилдиг,  үре-түңнелдиг ажылы дээш янзы-бүрү чергениң хүндүлел бижиктери-биле шаңнаткан. Бүгү Россияда казна албан черлериниң рейтингизи езугаар Тыва Республика каш чыл дургузунда хары угда 32  чергени артап, багай эвес турушту ээлеп турар. Оларның келир үеде салдынган сорулгалары улуг. Чижээлээрге, «Казна албан чери – банк» деп төлевилелди херек кырынга боттандырары-биле хемчеглер кидин түлүк. Казна ажылдакчылары хүн  бүрүде ажыл-херээнден аңгыда уруглар бажыңынга болгаш өске-даа организацияларга ачы-буян чедирип, дузалажып чоруур. Олар — хөй-ниитиниң хемчеглериниң доктаамал киржикчилери. Ажылдакчыларның аразында «Тергиин ажылдакчы», «Тергиин килдис» дээн ышкаш мөөрейлерни эрттирип турар.

Байырлыг хуралдың түңнелинде шылгараңгай ажылдакчыларга хүндүлел бижиктерни болгаш юбилейлиг медальдарны тывыскан.

Азияна Тау.