Тываның Баштыңы киржир

Тываның Баштыңы Шолбан Кара-оол Россия Федерациязының  Президентизиниң удурткан делегациязының составында Кыдатта барган. 

Кыдат Улус Республиканың Даргазы Си Цзиньпинниң чалааны-биле РФ-тиң Президентизи Владимир Путин май 20-де Кыдатта чеде берген. Шанхай хоорайга болуп эртер ужуражылгага удуртукчулар Россия биле Кыдаттың ниити айтырыгларын чугаалажыр. Садыг-экономика, энергетика болгаш гуманитарлыг адырларның элээн каш чугула документилеринге ат салыр. Делегейге Россия биле Кыдаттың кады ажылдажылгазының байдалын болгаш келир үезин сайгарып көөр. «Бо ужуражылга ийи чурттуң бүгү талалыг кады ажылдажылгазының болгаш удур-дедир харылзаазының стратегиязын чаа деңнелче үнериниң демдээ» — деп, Кремльдиң парлалга албаны дыңнаткан.

Май 21-де Россияның Президентизи Азияга кады ажылдажылга болгаш бүзүрелдиң хемчеглериниң талазы-биле дөрткү Чөвүлел хурал (СВМДА) саммитке киржир. Ону Азияның амыр-тайбың болгаш турум, чаа байдалга улам быжыглаарынга тураскааткан. Азияның Чөвүлел хуралы саммитти келир үеде улам хөгжүдерин база сайгарып дугуржур.

Владимир Путин Шанхайга турган үезинде саммит хуралдың киржикчилери-биле ийи талалыг ужуражылганы чорудар.

Азияның Чөвүлел хуралы саммитке албан-езу делегады бооп киржип, Россияның регионунуң сонуургалын төлээлеп, федералдыг эрге-чагырганың онза контролюнда турар демир-орук төлевилелин боттандырарының айтырыгларының дугайын чугаалажырын Тываның Баштыңы Шолбан Кара-оол дыңнаткан.