Италияга камгалаар

Март 17-22 хүннеринде Калининград хоорайга элээди, аныяк база улуг оолдар, уруглар аразынга кикбоксингиниң эң кадыг К-1 хевиринге Россияның чемпионады болуп эрткен.

Аңаа Россияның 44 аңгы девискээринден 350 кижи киришкен. Тываның адын камгалап, 8 спортчу, 1 тренер башкы, 1 судья киришкеш, чедиишкиннерлиг чанып келген.

42 килге Уран-Херел Ховалыг (Улуг-Хем), 45 килге Борис Хертек (Ак-Довурак хоорай) 1-ги черлерни, 48 килге Дозураш Бадын-оол (Мөңгүн-Тайга), 51 килге Байыр Монгуш (Чадаана хоорай), Орлан Монгуш (Кызыл хоорай) 3-кү черлерге төлептиг болган.

Бо оолдарны эки белеткээн тренер башкылар Алибек Монгуш, Мөнгүн Иргит, Аян Иргит, Роберт Сандан-оол, Мерген-оол Монгуш олар.

У.-Х. Ховалыг биле Б. Хертек сентябрь айда Италияның Рим хоорайга делегейниң бирги чери дээш болур маргылдаага Тываның адын камгалап киржирлер.

Уран-Херел  Ховалыг, Шагаан-Арыг хоорайның 2 дугаар школазының 7-ги классчызы:

 — Кикбоксинг секциязынга 4 класстан барып эгеледим. Тывадан дашкаар маргылдааларга Красноярск хоорайга киришкен мен.  Алдын медаль алганым дээш аажок өөрүп тур мен. Бедик шаңнал чедип  алганым дээрге тренер башкыларым Алибек Монгуш биле Диана Доктугунуң ачызы-дыр. Оон аңгыда мени деткип чоруур авам Маны-Кара Хертековна Ховалыг, даай-авам Оюмаа Хунай-ооловна Биче-оолга өөрүп четтиргеним илередип тур мен.

Борис Хертек, Ак-Довурак хоорайның 1 дугаар школазының 9-ку классчызы:

-- Тывадан дашкаар бир дугаар 2010 чылда Красноярск хоорайга кикбоксинг маргылдаазынга киришкеш, алдын медаль чаалап алганым уттундурбас болду. Калининград хоорайга алдын медаль чаалап алганым дээш тренерлеримге болгаш авам Аяна Дилгижековна Ооржакка четтиргеним илередип, өөрүп тур мен.

Шончалай  ХОВАЛЫГ.