ДЕЛЕГЕЙНИҢ ХЕРЭЭЖЕННЕР ХYНY МАРТ 8-БИЛЕ!

Тываның хүндүлүг херээженнери!

Бистиң эргим аваларывыс, өг-бүлелерниң херээжен ээлери, уругларывыс болгаш угба-дуңмаларывыс!

Республиканың бүгү эр кижилериниң өмүнээзинден Март 8-биле чедирген эң изиг байырывысты болгаш эң чаагай күзээшкиннеривисти хүлээп ап көрүңер! Часкы байырлалдың бо хүнүнде өөрүп четтиргенивисти, ынакшылывысты болгаш хүндүткеливисти херээжен чонга илередип турар бис.

Чер кырында бүгү-ле эргим чүүлдер Херээжен кижиниң ады-биле холбашкан. Шаг-төөгүден бээр кыс чон ынакшылдың, чараш-чаагай чоруктуң, мерген угаанның болгаш чаагай сеткилдиң илерели болуп келген. Бодуңарның сагыш човаашкыныңар болгаш киржилгеңер-биле, мерген угааныңар болгаш шыдамык чорууңар-биле делегейни улам чырык, улам чымчак, улам арыг болдуруп турар силер. Бүзүрел, идегел болгаш ынакшыл деп эртинелерни ханы медереп билип алырынга эр улусту кижизидип турар силер. Өөрүшкү-маңнай үезинде бисти сорук киирип, берге үеде деткип, кижи болурунга кижизидип турар силер. Силерниң-биле кожа чорааш, күштүг болгаш буянныг сеткилдиг болурунга чүткүлдүг апаар бис.

Силерниң амыдыралчы мерген чорууңардан, чаагай сеткилиңерден болгаш сагыш салыышкыныңардан өг-бүлениң байдалы, угаан-бодал чаңчылдарының үргүлчүлеп уламчылаашкыны хамааржыр.

Чүгле өг-бүлениң ээзи, уруглар өстүрүп база кижизидип турар эвес, профессионал ажыл-чорудулганың аңгы-аңгы адырларынга чедиишкиннерни чаалап ап чоруур силер. Чонну өөредип, эмнеп, бүдүрүлгеде ажылдап, коллективтерни удуртуп, идепкейлиг  хөй-ниити амыдыралын чо­рудуп, эрге-чагырга органнарынга харыысалгалыг албан-дужаалдарны ээлеп турар силер. Силерниң хамааты туружуңардан бистиң республикага чаагай өскерлиишкиннер, ниитилелдиң чаңгыс демнии болгаш турум чоруу хамааржыр.

Иениң болгаш чаштың күрүне деткимчези бистиң социал политикавыстың кол айтырыы болур. Ие-херээженниң хөй-ниити байдалын бедидери, хөй уругларлыг өг-бүлелерни материалдыг деткиири, бичии хамаатыларны кижизидеринге эргежок чугула байдалдарны тургузары дээш республиканың Чазаа болгаш парламентизи бүгү чүүлдерни кылып турар. Бо талазы-биле кылыр ажылдар ам-даа хөй. Ону боттандырарынга чигзинмес бис, чүге дээрге ниитилел амыдыралынга силерниң боттуг киржилгеңерни доктаамал көрүп турар бис.

Частың баштайгы байырлалын юбилейлиг чылда, Тываның болгаш Россияның демнежилгезиниң 100 чылының эгезинде уткуп турар бис. Юбилей ол дээрге эрткен орукче хая көөрүнге, чаа Тываны тургузарынга, улуг Россияның чоннар-биле сырый кады ажылдажылгазын сайзырадырынга боттарының салыышкынын кииргеннерге хүндүткелди көргүзериниң чогумчалыг үези-дир. Төөгүнүң чаа чүс чылынче кирип тура, республиканың амыдыралынга бистиң херээженнеривистиң кииргени аажок улуг салыышкынын демдеглевейн барбас бис.

Силерге быжыг кадыкшылды, хууда улуг аас-кежикти, бүгү-ле эки чүүлдерни сеткиливис ханызындан күзедивис!

Эргим, чоок болгаш ынак кижилериңер силерниң-биле кезээде кады чорзун, уругларыңар боттарының чедиишкиннери-биле, а эр кижилер—кичээнгейлиг чоруу-биле өөртүп чорзун. Хөй чылдарда айыраң-каас чечектер болгаш хүлүмзүрүг, өөрүшкү болгаш чырык амыдырал чайнаар болзун!

Байырлал-биле, эргим херээженнер!

Тыва Республиканың Баштыңы   Ш. Кара-оол.

Тыва Республиканың Дээди Хуралының (парламентизиниң) Даргазы  К. Даваа.