Олимпиадага тураскаадып

Тожу кожууннуң суму школаларының командаларының аразынга Сочиге болур кышкы Олимпий оюннарынга тураскааткан спортчу мөөрей болуп эрткен. Аңаа Тоора-Хемниң, Адыр-Кежиг, Ий база Ийниң санаторлуг школазының школачылары хаак болгаш дагдан шанакка бадар маргылдааларга киришкен.

Хаак маргылдаазынга Тоора-Хем школазының командазы бирги черге төлептиг болган. Ийиги база үшкү черлерни Адыр-Кежиг биле Ий школалары тус-тузунда алган. Назы-хар аайы-биле оолдар аразынга бирги черни Юра Монгалбии (3 кл.), Батый Сундуй (6 кл.), Ай-Херел Кол (7 кл.), Начын Хоедар (9 кл.), а уруглар аразынга Куней Белекпен (6 кл.), Татьяна Вист (6 кл.), Шуру Шыырап (11 кл.), Сайлык Кол (11 кл.) олар тергиин хаакчылар болганнар.

Дагдан шанак-биле бадар маргылдаага Тоора-Хемниң ортумак школазының өөреникчилери кончуг кашпагай болган, а ийиги черни Адыр-Кежигниң школачылары алган.

Демир-оол САЛЧАК, методист башкы.

Тожу кожуун.