Олимпиаданы көөр күзелдиг улустарга

Тываның Аныяктар херектериниң болгаш спорт талазы-биле яамызының дыңнадып турары-биле алырга, XXII Кышкы Олимпий оюннарының ажыдыышкынынче баар күзелдиг кижи бүрүзү Сочиже баар билеттерни боттары садып ап болур. «Сочи-2014» оргкомитет Тыва Республикага 50 билет квотазын аңгылаан. Оларны спорттуң дараазында хевирлеринге үлээн: бобслей —1, хаак – 7, трамплинден хаактыг шураары – 1, шанак спорту – 2, дүрген чарыш – 6, херээжен улус хоккейи – 20, эр улус хоккейи – 12, шорт-трек – 1 билет.

Билеттерни «Сочи-2014» оргкомитеттиң www.sochi2014.com албан-езузу-биле сайтызындан чагыдып садып алыр. Бо сайтта маргылдааларның графигин болгаш билеттерниң өртээн айтып каан.

2014 чылдың март 7-ден 16-га чедир болур XI Кышкы Паралимпий оюннарынче билеттерни база садып ап болур. Ажыдыышкынынче билет өртээ 700 рубльден 5000 рубль, хаашкынынче 400 рубльден 2000 рубльге чедир.