Владислав Ховалыг республиканың школа назыны четпээн өөредилге албан черлериниң ажылдакчыларынга профессионал байырлалы-биле байырны чедирген

Бөгүн школа назыны четпээн өөредилге черлериниң кижизидикчи башкылары болгаш ажылдакчылары профессионал байырлалын демдеглеп турар. Тываның Баштыңы Владислав Ховалыг бодунуң хууда блогунда өзүп олурар салгалды өөредип-кижизидер күш-ажылы болгаш үлүг-хуузу дээш, башкыларга четтиргенин илередип, мергежилдиң төлээлеринге байырын чедирген.

"Уруглар садтарының 2700 ажыг кижизидикчи башкылары болгаш ажылдакчылары янзы-бүрү угланыышкыннарлыг чаа өөредилге программалары-биле ажылдап турар. Чижээ, «Тыва дыл – чаштарга» деп төлевилел Тыва дылды сайзырадырының стратегиязы-биле боттанып турар. Кижизидикчилерниң болгаш башкы ажылдакчыларның мергежилин бедидеринче онза кичээнгейни углаан. Аңаа Россияның чырыдыышкын яамызы дузалажып турар" – деп, Тываның Баштыңы бодунуң байыр чедириишкининде айыткан.

Чазак школа назыны четпээн өөредилге инфраструктуразын калбартырынга база ону модернизастаарынга улуг ажылды чорудуп турарын ол демдеглээн. Сөөлгү чылдарда республиканың кожууннарында 360 олуттуг 5 уруглар садтары туттунган.

Бөгүн регионалдыг өөредилге төлевилелдеринче онза кичээнгейни углап, Тывада 27 муң ажыг чаштар школа назыны четпээн өөредилге билиглерин ап турар. Шупту уруглар садтарында дыл программазын киирген. Ада-иелерниң күзелдери-биле уруглар неделяда ийи катап төрээн дылын сайзырадыр кичээлдерде өөренип турар.

Чаа өөредилге чылында «Хүрешти уруглар садтарынче» регионалдыг программа уламчылаар. Тыва хүрештиң спортчу секцияларында 4-7 харлыг сес муң ажыг оолдар барып турар. Ол төлевилелди боттандырары-биле тускай өөредилге-методиктиг дептерни ажылдап кылган, хүрежир кудустарны шупту муниципалиттерде үлээн.