Тываның школачылары Россияның энергетиктиг система тургузуунуң дугайында сонуургаан

Россияның энергетика неделязы-2024-ке тураскааткан лекциялар Тывада болгаш чурттуң өске регионнарында эртип турар. «Билиг» российжи ниитилел болгаш Россия Федерациязының Энергетика яамызы темалыг чырыдыышкын хемчеглерин организастаан. Бо хүннерде өөредилге черлеринде лекциялар болгаш дискуссия шөлчүгештери ажылдап турар. Бо хонуктарда республика найысылалының школаларынга ийи чырыдыышкын хемчеглери болуп эрткен.

Т.Б. Кечил-оол аттыг Кызылдың 3 дугаар школазынга база Тыва Республиканың күрүне лицейинге энергетика дугайында лекцияларны номчаан. «Билиг» российжи ниитилелдиң лектору, регионнуң одалга болгаш энергетика сайыдының бирги оралакчызы Суге-Маадыр Чуглур улуг класстар өөреникчилеринге бистиң чуртувуста Россияның энергетика неделязының төөгүзүн база энергетиканың нарын системазын таныштырган. Уруглар хөмүр-даш үлетпүрүнүң хөгжүлдезинден эгелээш, углекислоталыг газты үндүрбейн водород болу бээр чаа перспективтиг энергия берикчилериниң хевирлеринге чедир солун чүүлдерни билип алганнар.

Школачылар республикада хөмүрнүң курлавыры каш чылдарга четчирил, Мөңгүн-Тайга болгаш Тожу кожууннарда хүнден октаг алыр чырык станцияларын сонуургап, бо адырга канчаар ажылга тургустунуп болурунуң дугайында лекторга айтырыгларны салган. Бирги оралакчы сайыт бодунуң арга-дуржулгалары-биле солчуп, дээди өөредилге черлеринче дужаап киреринге херек эртемнерни таныштырган. «Бодум үемде кол эртемим кылдыр энергетиканы шилип алганым, шын болгаш кедилиг боорда, кол угланыышкын болган деп ам билген мен» - деп, Суге-Маадыр Чуглур демдеглээш, ол мергежилди сонуургап көөрүн оолдарга сүмелээн. «Мурнуңарга дыка хөй оруктар ажыттынып келир, Россияда эң херек специалист апаар силер» – деп, ол чугаалаан.

Энергетика – сөөлгү 20 чылда улуг чаартылганы эрткен Россияның экономиказының өзек адырларының бирээзи. Бистиң чуртувус улуг курлавырлар баазалыг болгаш технологтуг чугула үндезиннерлиг болганындан, делегей рыноктарында лидерлер санында база делегей чергелиг энергетика айыыл чок чоруунуң магадылакчызының бирээзи болуп турар.