Кызылдың президентиниң кадет училищези – 10 чылдаан

Кадеттер училищезиниң бирги юбилейинге тураскаадып «Российжи кадеттерниң одуруунда он чыл» деп байырлал концертин бөгүн Тываның Национал хөгжүм-шии театрынга көргүскен. Республиканың Баштыңы Владислав Ховалыг ук хемчегге киришкен.

«Бөгүн Кызылдың президентиниң кадет училищези – бистиң чоргааралывыс-тыр. Өөредилгениң шынарының талазы-биле бедик президент статузун бадыткап, Россияның Камгалал яамызының дээди өөредилге черлеринче белеткээр албан черлериниң аразында көскү черни ээлеп турар» - отметил руководитель республиканың удуртукчузу демдеглээш, ам-даа сайзарып, чечектелирин өөредилге черинге күзээн.
Владислав Ховалыг юбилейлиг чылда чурттуң Президентизи Владимир Владимирович Путин Билиглер хүнүнде училищеге кээп чорааны улуг болуушкун болганын, башкыларның ажылынга болгаш кадеттерниң чедиишкиннеринге бедик демдектерни салып, кажан мындыг өөредилге черлерин көргеш Россияның келир үезинге бүзүрел бар деп демдеглээнин база катап айыткан.

Тываның Баштыңы өөредилге чериниң шылгараңгай башкыларынга болгаш ажылдакчыларынга күрүне шаңналдарын тывыскан. Склад эргелекчизи Лариса Хомушку, методиктиг кабинет эргелекчизи Елена Вебер, даштыкы дылдар башкызы Эмилия Куулар республика Баштыңының Өөрүп четтириишкинин алганнар. А физика, химия база биология башкызы Мариана Халбыны Тываның Баштыңының Хүндүлел бижии-биле шаңнаан. Кижизидилге ажылының талазы-биле килдис эргелекчизи Наталья Нелюбина база физика, химия болгаш биология башкызы Татьяне Коноваленко «Тыва Республиканың алдарлыг ажылдакчызы» хүндүлүг атка төлептиг болганнар.

Кадеттер байырлал концертинде училищениң төөгүзүн, ооң идеязын база российжи кадеттерниң болгаш дайынчы алдарның ниити овур-хевирин көргүскеннер. Театрның фойезинге өөреникчилерниң «…Ада-чуртка сагыш-сеткилдиң дээди сөңүн бараалгадыыл» деп делгелгезин организастап, чанынга экраннарга чурттуң Камгалал яамызының өөредилге черлеринден байыр чедириишкиннерлиг роликтерни дамчыдып, байырлалдың аалчыларынга фотозонаны аңгылап тургускан.

Кызылдың ПКУ – Россияның Камгалал яамызының дээди өөредилге черлеринче белеткээр ниити өөредилге албан черлериниң системазында оолдар, уруглар өөренип турар чүгле чаңгыс албан чери болуп турары онзагай. Училище он чыл иштинде 335 кадетти доостурган. Доозукчулар ЕГЭ-лерде бедик баллдарлыг болгаш чурттуң эң-не шыырак дээди өөредилге черлериниң бюджет олуттарынче, Камгалал яамызының, шеригжиткен структураларның дээди өөредилге черлеринде өөредилгезин уламчылап турарлар.