Владислав Ховалыг: «Чон боттуг ажыл-херектерни, боттуг үре-түңнелдерни манап турар»

Бөгүн, сентябрьның 26-да, Тыва Республиканың Баштыңы Владислав Ховалыгның киржилгези-биле Тыва Республиканың Дээди Хуралының (парламентизиниң) дөрткү чыыжының бирги организастыг хуралы болуп эрткен.

Тыва Республиканың Баштыңы Владислав Ховалыг сөстү алгаш, депутаттар корпузу ССРЭ-ниң составынче республиканың эки тура-биле каттыжып киргениниң 80 чылын демдеглээн онза ужур-уткалыг солун үеде ажылдап эгелээнин чугаалаан. Чаа Дээди Хуралда тыва парламентаризмниң хоочуннары болгаш депутат ажылче бир дугаар кирген кижилер бар. Парламентарийлерниң одуруунда тускай шериг операциязының киржикчилери, хоорай болгаш кожууннар төлээлекчилер органнарынга депутаттап ажылдаан арга-дуржулгалыг кижилер база келген.

Регионнуң кол хоойлужудулга органында дөрт партия боттарының төлээлерин кииргенин баштың демдеглээн: «Республикада политиктиг турум байдалды болгаш хамааты чугаажылганы тударынга аңгы-аңгы политиктиг көрүш херек».

Владислав Ховалыг депутат корпузунуң идепкейлиг киржилгези херек улуг ажылдар манап турарын демдеглээн. Хуралдың ооң мурнунда составындан артып каан хоойлуларга, төлевилелдерге ажылды соңгаарлатпайн эгелээр херек. Тускай шериг опреациязының киржикчилерин болгаш өг-бүлелерин деткиир, чер хоойлужудулгазын, инвестицияларны хаара тударының арга-хевирлерин, биче болгаш ортумак бизнести деткиирин сайзыраңгайжыдар дугайында хоойлуларга ажылдап кылыр.

Тыва шапкын туттунуп база сайзырап, экономика бурунгаарлап турда, республиканың эрге-чагыргазының ийи адырының төлээлери күжениишкиннерин каттыштырып, Президент Владимир Путинниң сентябрьда Тывага кээп чорааш чагааны езугаар, чедип алган темпини салбас деп, Тываның Баштыңы чугаалаан.

«Соңгулда мурнунуң кампания үезинде депутат бүрүзү соңгукчулардан чагыгларны алган. Ол чагыгларны ужур-дузазының болгаш дүргениниң аайы-биле чурумчудар херек, оон республиканың күүсекчи эрге-чагырга база тус чер бот-башкарылга органнары-биле кады оларның күүселдезин чедип алыр арганы тывар. Силер кандыг партияны төлээлеп турарыңардан хамаарылга чокка, чон боттуг ажыл-херектерни, боттуг үре-түңнелдерни кезээде манап турар» - деп, Владислав Ховалыг чугаазын дооскан.

Бирги хуралдың үезинде, чаңчыл езугаар, чаартынган хоойлужудулга органының удуртукчуларын соңгуп, ооң тургузуун бадылаан. Тываның парламентизи хөй   партийжи апарып, хары угда дөрт партиядан депутаттар ажылдаар: «Чаңгыс демниг Россия» – 28, КПРФ – 2, ЛДПР – 1, Чаа кижилер – 1. Тос комитетти бадылаан, ооң чедизи – доктаамал, а ийизи – доктаамал эвес үндезинниг.

Депутаттарның эң хөй үнүн алгаш, ТР-ниң Дээди Хуралының даргазынга Кан-оол Даваа, ооң оралакчызынга Андрей Листков соңгуткан.

Дээди Хуралдың экономиктиг, саң-хөө-бюджет, үндүрүг политиказы, сайгарлыкчы чорук болгаш күрүне өнчүзүнүң талазы-биле комитет даргазында Андрей Листковту соңгаан.

Дээди Хуралдың күрүне тургузуу болгаш тус чер бот-башкарылгазының талазы-биле комитет даргазында Людмила Осмоловскаяны, инфраструктура сайзыралы болгаш үлетпүр политиказының талазы-биле комитет даргазында Эрес Хууракты, аграрлыг политика, чер хамаарылгалары, бойдус ажыглалы болгаш экология талазы-биле комитет даргазында Байбек Монгушту, өөредилге, культура болгаш информастыг политика даргазында Белекмаа Мунгени, национал, аныяктар политиказы, спорт, туризм болгаш эвээш санныг үндезин чоннар херектериниң талазы-биле комитет даргазында Саян Ондарны, кадык камгалалы, чонну ажылга хаара тудар болгаш социал политика талазы-биле комитет даргазында Долаан Калбакты, айыыл чок чорук болгаш корум-чурум талазы-биле комитет даргазында Аяс Санчатты соңгааннар.

Роман Тамоев биле Ролан Ооржактың удуртуру Регионнар болгаш чоннар аразының харылзаазының комитеди болгаш Массалыг информация чепсектери болгаш хөй-ниити организациялары-биле кады ажылдажылга комитеди – ийи комитет доктаамал эвес үндезинге ажылдаар.