Тыва - Сибирь федералдыг округда эң хөй хөмүр кулавырын белеткээн регионнарның санында

Президентиниң Сибирь федералдыг округда бүрүн эргелиг төлээзи Анатолий Серышевтиң эрттиргени хуралда келир кышка Сибирь Федералдыг округ регионнарының белеткелин сайгарып чугаалашкан. Округтуң шупту субъектилериниң удуртукчулары киришкен хурал видеоконференц харылзаазы-биле эрткен. Тываның Баштыңы Владислав Ховалыг Тывада чылыдылга-энергетика комплекизи ажылдаарынга белен, одалга сезону чогуур үезинде эгелээнин илеткээн.

«Анатолий Анатольевич чылыдылга-энергетика комплекизиниң база чуртталга-коммунал ажыл-агыйының шупту системаларының чогумчалыг ажылын хандырары чугула деп демдеглээн – деп, Владислав Ховалыг социал четкилерде бодунуң блогунда хурал соонда демдеглээн. – Ук адырда тургустунган кандыг-даа айтырыгларны дыка дүрген чайладыр. Чурттакчы чонга кылып турар ажылдар дугайында болгаш планныг кандыг-даа өжүрүлделерни дүрген дыңнадыры чугула».

Бүрүн эргелиг төлээ-биле эрткен хуралда дыңнаткан сан-чурагайлардан алырга, Сибирь регионнарының коммунал объектилеринде кышка белеткел ажылдары 90-100 хуу доозулган. Тыва Республика – Алтай, Хакасия, Алтай край, Иркутск, Кемерово база Томск областар-биле кады, хөмүр-даштың чогуур курлавырын долу хемчээлде белеткээн регионнар санынче кирген. Округтуң арткан субъектилери курлавырны белеткээрин доозуп турар.

Округтуң регионнары бо чылын 2022 чылга деңнээрге ийи катап хөйге, азы 560 км чылыг четкизин чаартып солааны демдеглеттинген.

Хурал үезинде чырык-четки комплекизиниң идегелдиг ажылын хандырарын аңгы сайгарган. Сибирьниң каттышкан энергосистемазында чырык энергиязынга хереглел өзүп турарын демдеглээн.

«Сибирьниң дошкун кыжының үезинде коммунал системаларның идегелдиг ажылдаары – хамаатыларның амыдырал-чуртталгазынга база чаагай чоруунга таарымчалыг байдалдарны тургузарынга чугула фактор болур. Россия Федерациязының Президентизи Владимир Путин шак ындыг даалганы бистиң мурнувуста салган» – деп, Анатолий Серышев чугаалаан. Одалга үезин эки ажып эртер дээш, доктаамал база демниг ажылдаар апаар, деп бүрүн эргелиг төлээ түңнээн.

Ам одалга үезин эрттиреринге харыысалгалыг ведомстволар – Тываның Одалга-энергетика яамызы, Чуртталга-коммунал ажыл-агый яамызы, курлавыр хандырылга организациялары, ол ышкаш муниципалдыг эрге-чагырга черлери чурттакчы чон-биле доктаамал харылзаага турар ужурлуг деп, республиканың Баштыңы бодунуң блогунда демдеглээн. Бо үеде бистиң мурнувуста кол айтырыгларның бирээзи – чурттакчы чондан кирген айтырыгларга база хомудалдарга дораан харыылап, ЧЭК база чуртталга-коммунал комплекизиниң кол белдирлеринде байдалды доктаамал хынаар.