Тывада национал төлевилелдерниң 8 айда саң-хөө күүселдезиниң түңнелдерин үндүрген

Сентябрь 1-нии-биле алырга, Тывада национал төлевилелдер көргүзүглерин чедип алганының ниити деңнели 96,9 хуу болган. Республика Баштыңы Владислав Ховалыгның эрттиргени неделяның аппарат хуралында национал төлевилелдер ажылдары канчаар чоруп турарын сайгарып чугаалашкан.

Тыва 13 национал төлевилелде киржип турар, оларда 43 регионалдыг төлевилелдер барын сагындыраал. 2024 чылда төлевилелдер боттандырылгазынче ниитизи-биле 10,6 млрд рубль көрдүнген, оларның 10,3 млрд рубли – федералдыг акшаландырыышкын болза, 300 млн рубли – республиканың бодунуң акша-хөреңгизи.

ТР-ниң Саң-хөө яамызының дыңнатканы болза, национал төлевилелдер шугуму-биле ажыл-чорудулганы хандырарынга сентябрь 20-ге чедир 5 млрд 350,2 млн рубльга, азы чылда планның 50,5 хуузун акшаландырган. Касса шиңгээдилгези - 4 млрд 417,4 млн рубль.

Республика «Туризм болгаш хүндүлээчел чорук индустриязы», «Айыыл чок болгаш шынарлыг автомобиль оруктары» болгаш «Күш-ажылдың бүдүрүкчүлүү» үш национал төлевилелдер талазы-биле акша-хөреңгини 100 хуу шиңгээткен. Дараазында төлевилелдер хуусаазында чоруп, акша-хөреңгини бедик деңнелде шиңгээдип турар – «Экология» (89,6 хуу), «Биче болгаш ортумак сайгарлыкчы чорук» (73,5 хуу) база «Кадык камгалалы» (68,3 хуу%).

Алды национал төлевилелдерниң акша-хөреңгизи аңгы-аңгы чылдагааннар ужурундан элээн оожум шиңгээттинип турар. Төлевилел документациязынга күрүне экспертизазын саадатканындан, «Чуртталга оран-савазы болгаш хоорай хүрээлеңи» нацтөлевилелче кирген Каа-Хем хоорайжың суурда база Ак-Довурак хоорайда суг чыыр чер тудар болгаш эде чаартыр ажылдарның хуусаазы аткаарлай берген.

Ол ышкаш «Демография» национал төлевилелдиң Дерзиг-Аксы суурда тудуп турары 180 орун-олуттуг бажың-интернады графиктен озалдаан. Бөгүн ол чүгле 42 хуу туттунган. Оон аңгыда сес санныг школа тудуунда тудугжулар база-ла ындыг байдалда. Алды школаның тудуг ажылдарын хуусаазында доозуп болур, а Чадаана хоорайда база Кызыл-Хая суурда ийи школаны 2024 чылдан 2025 чылче чылдырары планнаттынган. «Делегей кооперациязы болгаш экспорт» национал төлевилелден акшаландырыышкынныг суггат системаларын катап тургузар ажылдар канчаар-даа аажок оожум чоруп турар.

Тываның Баштыңы сайгарылганың түңнели-биле, капитал тудуг объектилеринде ажылдарның темпизин дүргедедир хемчеглерни алырын вице-премьерлерге болгаш сайыттарга онааган. Бир эвес тургускан хуусаазында канчап-даа четтикпес болза, объектилерниң акшаландырыышкынын арттырып алыр дээш, федералдыг ведомстволар-биле дугуржулгаларны өскертип, күүседир хуусаазын чылдырарының чогуур хемчеглерни алырын Владислав Ховалыг негээн.