ТШО киржикчилеринге дуза чедирери-биле Тывага ачы-буян шуулган-марафону эрткен

Кызылдың Аныяктар ордузунга, Тываның Улусчу фронтузунуң тускай шериг операциязының киржикчилерин деткиири-биле организастааны «Тыл – фронтуга! Бүгү чүвени тиилелге дээш!» деп бир дугаар шуулган-марафон болуп эрткен.

Шуулган үезинде волонтерларга мастер-класстарны эрттирген. Чаштынар четкилер аргыырынче, тактиктиг носилкалар болгаш тепловизордан камгалал чоорганнар кылырынче келген чонну чалаан.

«Бистиң бөгүнгү сорулгавыс – арга-дуржулга солчуп, волонтерларывысты чаа чүүлдерге өөредири. А мындыг ужуражылгалар Тываның Улусчу полугунуң санын калбартыр арганы бээр дээрзинге идегээр-дир бис, чүге дизе дайынчылардан дилеглер хөй, бир дугаарында чаштынар четкилер дээш, херек чүүлдер-ле бар» - деп, Улусчу фронтунуң регионалдыг салбырының удуртукчузу Саима Далчин демдеглээн.

Красноярск крайдан волонтерлар арат продуктуларындан кургаг быдаалар белеткээриниң технологиязын айтып берип, арга-дуржулгазын солушкан. Оларның продуктузу кылыры-даа, шыгжаары-даа, белеткеп чиптери-даа белен деп чугаалааннар.

Шуулганны сонуургап келген чон Тываның Улусчу полугунуң волонтер пунктуларының кылган чүүлдериниң ачы-буянныг делгелге аукционунга киржир аргалыг болган. Тускай шериг операциязының зоназында дайынчыларга херек барааннар болгаш дериг-херекселдер садып алырынче аукциондан кирген акша-хөреңгини чорудар.