Тывада хөй ажы-төлдүг өг-бүлелерге “социал” хөмүр-даш сөөртүлгези эгелээн

Тывада хөй ажы-төлдүг 2856 өг-бүле 2024 чылда одаар ыяшты болгаш хөмүр-дашты халас алыр. «Социал хөмүр» ачы-буян төлевилелиниң күүселдезин харыылап турар республиканың Күш-ажыл яамызы болгаш одаар чүүл болгаш энергетика яамызы ооң күүселдезиниң кайы хире чоруп турарын бо неделяда регион чазаанга илеткээн.

Ведомстволарның дыңнатканы-биле алырга, Кызыл биле Каа-Хем кожууннарда гуманитарлыг хөмүр чедирилгези эгелээн. ТР-ниң Одалга болгаш энергетика яамызы-биле чарган керээ езугаар, чурттакчы чонга одаар чүүлдүң сөөртүлгезин республикада кадыг боктар-биле ажылдыг оператор - «Транспорт ачы-дузазы болгаш төлевилели» күрүнениң унитарлыг бүдүрүлгези күүседип турар. Хөмүр-дашты бо хевирниң ачы-дуза алыкчылары чурттап турар 114 чурттакчылыг черлерже  октябрь 30-ге чедир чедирер.

Губернатор төлевилелинге киржип турар өг-бүле бүрүзүн регион бюджединиң акша-хөреңгизи-биле 2145 кг хөмүр-даш азы 4,8 куб метр одаар ыяш-биле хандырып турарын сагындыраал. Бир эвес өг-бүле печка-биле одаар бажыңныг, орулгазы амыдырап-чурттаарының хемчээлинден ашпас боорда, дөрт азы оон хөй ажы-төлдүг болза, дузаны алыр.

«Демография» национал төлевилел деткимче хемчээн акшаландырып турар. Ооң ачызында 2023 чылда Тывада 2971 өг-бүле хөмүр-даш болгаш одаар ыяш-биле хандыртынган. Республиканың Күш-ажыл яамызының демдеглээни-биле алырга, “социал” хөмүр-даш алыкчыларының саны чылдың-на өскерлип, сөөлгү үеде ол эвээжээн. Дыка хөй өг-бүлелер күрүне деткимчези-биле байдалын экижидип, төлептиг орулгалыг доктаамал ажылды тып ап турары-биле ол тайылбырлаттынар.