Тываның Баштыңы республиканың чонар-дашчыларынга профессионал байырлалы-биле байыр чедирген

Тывада бөгүн республиканың даш-чонукчулары профессионал байырлалын демдеглеп эрттирип турар. Тываның Баштыңы Владислав Ховалыг бодунуң байыр чедириишкининде ону бир дугаар демдеглеп турарын айыткан.

Бурунгу уран чүүлге амыдыралын тураскааткан кижилерге байыр чедирип тур мен. Хөөмей биле чонар-даш – тыва чоннуң ховар өнчүзү болгаш езулуг чоргааралы-дыр. Бистиң мастерлеривистиң ажылдары тывызыксыг сорунзалыг болгаш бүгү делегейде үнелекчилери хөй – деп, Тываның Баштыңы бижээш, “Тыва Республиканың алдарлыг даш-чонукчузу” хүндүлүг атты доктаатканын дыңнаткан. Хүндүлүг атты уран чүүлдүң хевиринде он ажыг чылдар иштинде ажылдап чоруур билдингир мастерлерниң онза ачы-хавыяазы дээш тыпсыр.

Тывага чонар-даш уран чүүлү шагда-ла тывылган. Россияның алдын фондузунче кирген тыва даш-чонукчуларының ажылдарын Тыва Республиканың Национал музейинден, Сибирьниң улуг хоорайларында, Москва база Санкт-Петербургта уран чурулга музейлеринден көрүп болур.

Байырлал бүдүүзүнде, Тывада чонар-даштың салым-чаяанныг мастери Черзи Хола-Салович Монгуштуң чырык адын сактып, Ак-Дуруг суурда хөрек тураскаалын ажыткан. «Чуртталганың угулзазы уран дашта сиилбиттинген» деп мөөрей ус-шеверлерниң делгелгезин организастаар. Чонар-даш уран чүүлүнүң кавайы - Бай-Тайга кожуунга «Сарыг-Хаяның чажыды» деп республика мөөрейи ус-шевер мастерлерни, сонуургактарны база сургуулдарны чалаан. Ол ышкаш Тыва АССР-ниң база Россия Федерациязының алдарлыг чурукчузу, даш-чонукчузу Хунан Киров Тулушовичиниң 80 харлаанынга тураскаадып чогаадыкчы мөөрей болуп турар.